新一年財政預算案尚未落實，暫時未知汽車首次登記稅會否有回落空間；但唔少汽車代理商，紛紛響汽車設備方面打主意，以求既能切合買家胃口之餘，又唔需要大幅調高新車價嘛！正如呢部豐田Alphard八人豪華MPV咁，既有齊全車皮椅，又有雙趟門同合金胎車令配搭，不過換裝上一台2.4公升直4偈而已，性能仍見不俗兼有慳油好處，但車價就只係34萬起，自然有一定吸引力啦！
記者、攝影：陳偉林
雖然Alphard車系會係豐田至豪華嘅MPV級別，但車廠為迎合要求經濟效益嘅用家，故除備有3.0公升V6偈外，亦有一台2.4公升偈供選擇。然而，全車前後一體化包裝講究，既有時款16吋合金胎軨組合，又有HID大燈、原廠霧燈同尾定翼配搭，外觀真係一啲都唔失禮㗎！
車廂三排八座位以上乘真皮鑲嵌而成，既有獨立頭枕，又有中央手枕同三點式安全帶，乘坐愜意舒適外，後排重可按需要收摺起，令尾廂空間倍增。再者，新車重備有雙趟門、全車電窗、門邊電鏡同中央門鎖，還有原廠音響及前後獨立恒溫冷氣，唔少得重有獨立三排房燈同雙安全氣袋㖭！
新車改配一台2.4公升直4DOHC偈，跟港版Previa相若，雖然加速稍欠一份爆炸力，惟整體表現不錯，兼有慳油嘅好處㗎！再者，一套4前速自動波轉檔明確敏捷，匹配上呢台VVT-i偈嘅低轉高扭力表現，重有低重心車架結構，令行車倍見平穩暢順呢！
一部至Top嘅八人豪華MPV，改配一台2.4公升直4DOHC偈，性能表現予人稱職合意，兼有慳油嘅好處；另外既有全車皮椅，又有雙趟門配搭嘅方便，響苛稅政策下，會係用家另一個好選擇。
豐田AlphardV2.4規格
引擎：2362cc直4DOHC
馬力：159ps/5600rpm
扭力：22.4kgm/4000rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）碟式（ABS）
輪胎：205/65R16BridgestoneB390
尺碼：4800×1805×1935mm
軸距：2900mm；車重：1840kg
平均耗油：12.0km/L
新車售價：$339,000起
車輛提供：富利堡汽車（23330747）