港股續跌，昨日係第6日。地產股仍有壓力，新地（016）跌20仙，收39.70元，跌破911之後低位，見98年10月以來低價。
地產市道低沉，賣樓股有波幅而難有升幅，近期嘅新地Call輪，屬高危一族，其中9593，最後有得剩嘅機會微乎其微。隻輪5月初夠鐘，過埋下周一，就變成「下月夠鐘」，距到期日又行前一大步。行使價47元，較正股現價高出7元以上，要期望正股喺個零月內彈升7元以上，好唔實際，隻輪現價1.8仙，好快趣近1仙嗰頭，每日有幾十球轉手，咪以為易買賣而博兩手。
新地Call輪9720比較實際，今年11月到期，現價24.8仙，溢價14.6%，槓桿率16倍。但若然正股下跌，隻輪一樣冇運行。要博，最好等正股更加超賣之時先至考慮，例如等正股低見38元至考慮。
華能國際（902）由7.15元彈上7.50元，Call輪9231、9738、9728紮紮跳，升幅全部超過2成，成交稍多嘅係9728，金額有80萬。賭華能Call輪，最正路係9728，9月到期，現價1.16元，溢價2.1%，槓桿率6.5倍，數據唔錯。但正股累積升幅唔細，恐怕冇乜水位。要做嘢，都係等正股回吐時先至研究。
章盛