可以話係香港棟篤笑開山鼻祖的黃子華，蟄伏4年，現正於新伊館舉行其第9次棟篤笑表演，唔少去睇Show嘅觀眾，都可以話係黃的擁躉，雖然全場觀眾笑聲不絕，不過，講到底佢哋似乎覺得今次演出不及過往精采，尤其部份提及負資產的更與99年的演出雷同。早前有報道指黃子華希望於2007年退休，有些觀眾竟然也認同！唉！做才子真係好難㗎！
記者：陳淑君、馬慶武
張達明
「演出一貫高水準，最喜歡尋找Ｘ街的故事，即扮鍾景輝講娛樂圈，講特首連任。咁多次演出最鍾意《娛樂圈血肉史》同《秋前算帳》，前者較原始貼身，後者則食正氣候，多人關心。覺得佢係很有創作、社會性嘅人，語言Punchline好強。佢嘅演出係跟觀眾呼吸，佢係大師，唔出嚟做都幾難搞，個人不希望佢退休，一個表演者若堅持，可以愈做愈好，應永不言退。」
吳鎮宇
「成個Show都好睇，最深刻講媒體同政府，最鍾意第一次、第二次同今次演出。唔覺得今次會係佢最後一次棟篤笑演出，冇特別可惜嘅感覺。」
陳淑蘭
「最近忙於搬屋，冇睇今次個Show，其餘次次都有睇，每一個都好鍾意，好笑得嚟又有意思。個人最鍾意《鬚根Show》，好似我不熟悉政治嘅都睇得明。若佢真係唔做會覺得可惜，棟篤笑已經代表他，連問阿婆都知，就算有後浪，都好難做到佢咁成功。」
徐先生（廚師）
「我哋男人梗係鍾意聽佢講啲有味笑話啦，不過覺得今次比起以前冇咁好笑，子華好似有啲勒住勒住，以前會攞吓中國領導人嚟講笑，𠵱家冇喇，可能太敏感啦。07年退休？都差唔多喇，名成利就之後就冇咁搏命，講嘢都冇咁啜核冇咁好笑㗎喇。」
Tim（學生）
「講中大迎新嗰單嘢講得有道理又搞笑，可能自己係學生，聽起嚟特別投入。不過我睇佢都係時候退休喇，啲笑話冇以前咁新鮮，好似已經乾乾哋塘。不如再拍吓電視劇啦。」
鍾小姐（文員）
「最好笑梗係董特首嗰段；話冇咗佢唔掂，原因係如果冇咗佢，以後香港有咩問題就唔可以再『賴』落佢度。哈！黃子華就係叻在知道觀眾想聽咩，近排香港差，鬧吓董生幫大家出吓氣梗係好笑啦。」
曹文（學生）
「佢話董建華做特首，都係董太叫佢做佢先出嚟選，都似喇，真係有心做點會做成咁呀。做棟篤笑做得最好始終都係黃子華，不過開始有啲公式化，可能唞番幾年出嚟再做會多番啲新鮮感。」
這次《聲色藝黃子華棟篤笑──冇炭用》的內容主要分為4部份，包括講及謝霆鋒、傳媒、自殺及政府，可能家陣時勢太差，只要提及特首，觀眾就將心中怨憤化做笑聲。除諷刺「阿董連任可以買樓2折」、「低B學做特首」、「佢如果唔帶保鑣入屋邨可以平安返出嚟，我就畀佢連任」；藉說霆鋒應終身監禁指為何不輕判警察外，全場表演也有不少精采之處，值得大家深思！
以前好想瞓但冇得瞓；𠵱家有得瞓，但瞓唔着。（點解唔享受一下現在可以放慢腳步的生活呢？以前那麼忙碌的生活真的很好嗎？）
我唔信佢偷步，如果偷步就唔會俾人知，而且我相信佢冇咁醒！（全場觀眾拍攔手掌！）
女仔審美標準同男仔審美眼光好唔同……男仔其實覺得女仔肥肥哋都OK，你有冇見過啲男仔見到條燈柱都話好索吖？如果啲男仔鍾意嘅話，咁就周街都冇晒啲燈柱啦！講真吖，本身係豬扒就唔使減㗎喇，肥嘅豬扒減做瘦嘅豬扒咪重唔吸引？點解唔考慮吓做羊扒？羶羶哋咪幾好！
也許，要回味過往更有料嘅棟篤笑演出，只可以靠睇VCD，但要搵齊有難度，其中97年《殺出廚房》並無發行VCD，而《拾下拾下》據悉已賣斷巿！
演出日期及時間：今、明、4月3至6日晚8:00
地點：灣仔伊利沙伯體育館
票價：$250、$200、$150