港股喺呢個禮拜連跌5日，雖然跌幅唔大，恒指噚日收8863，比上周五只下跌316點，跌幅3.4%，但在非典型肺炎衝擊下，而美伊戰況又愈來愈唔明朗，市場氣氛就好差，4月期指收8820，低水43點，看淡者仍佔多數。
國企股繼續成為追捧對象，指數高收2232，大升52點，幾隻重型股表現更突出。中石化（386）大升7仙，中石油（857）升3仙，華能（902）收7.5元，升0.35元。兩隻大型石油股表現一直落後大市，今次趁宣布業績而略為追回失地而已。其實，以現價計，中石化同中石油嘅息率有4至6厘，且今年平均油價亦會再進一步，現水平股價仍偏低，揸得過。
雖然市場已估計國企業績會有唔錯表現，但從已宣布的公司來看，平均仍比預期為佳，上海石化（338）係較為突出的例子，股價噚日繼續有反應，高見1.38元後回收1.36元，升3仙。至於經緯紡機（350），盈利增長亦勁，但由於前兩日已大升（由1.49元升上1.76元），噚日出現回吐，收1.68元，跌6仙。
經緯02年度（12月年結）營業額28.2億元（人民幣．下同），升27.6%，盈利1.36億元，升65.3%，每股盈利23分，末期息6分，PE7.75倍，息率3.3厘。
盈利升幅比預期大，主要是受營業毛利增加34%所帶動，而其他業務支出淨額則減少67%。集團預期今年原料價格轉趨穩定，雖然紡機價格不斷下調，惟銷量上升，以及成本控制得宜，足以抵銷價格下跌的影響，預期03年的毛利率仍可維持在去年的20.9%水平。
經緯已審議通過，授權公司董事會，在取得中國政府機關批准後，回購10%的H股，有關提案須A股及H股的股東大會通過。
在內地有A股發行的國企，H股股價通常都比A股有大幅折讓，幅度由40%至80%不等，公司資金若充裕，回購H股的做法，無論對公司和股東都有利。國企已度過困難時期，盈利重上升軌，相信回購的事例將會陸續有來。
郭兆誠