肺炎繼續困擾大市，港股反覆偏軟跌8點，收報8863，成交58.93億元。航空酒店股繼續遭拋售，國泰（293）跌2.86%，收10.20元，大酒店（045）挫5.2%，收報3.20元。繼東亞（023）之後，連滙豐（005）都有分行員工懷疑染上肺炎。
龍永圖噚日大鬧香港傳媒報道肺炎事件時唔夠平衡，影響香港經濟。發生疫症必然會影響經濟，但經濟衰咗可以再嚟過，股價跌完可以反彈，但信譽冇咗就好難重新建立。如果今次港府在處理肺炎事件上，好似廣東省政府咁當係高度機密，不對外提出警告，讓肺炎潮禍及鄰國，相信香港以後唔使再做國際城市，龍生口中所批評嘅不平衡報道，至少可以令當局、市民及各地提高警覺，阿虎就算再市儈，都認為生命比經濟利益重要得多，為經濟利益而罔顧他人生命者小心天譴呀。
講開肺炎，阿虎側聞華翔微電子（1195）似乎唔多識做，竟然喺呢個咁敏感時刻請分析員返大陸睇廠兼做吹風會，搞到班分析員都唔知去唔去好，阿虎有幾個朋友都話唔敢去，費事染上疫症，其實吹風會用視像會議亦一樣啫。
藝立媒體（8192）最近傳出被證監會緊盯，調查公司股份有否被操控。消息一傳出，股價立即偏軟，由1元樓上回落至0.90元水平後企穩。
噚日公司又公布，執行董事及策略規劃顧問鍾欣餘基於發展個人法律事業及私人理由而請辭。公司董事在如此敏感期間辭任，大家不能不小心。隻股噚日收報0.91元，升1.11%。此股去年12月由兩毫幾水平挾上3月時1元以上水平，其間又冇特別利好消息，成交又唔係特別多，如果話冇人為操控，各位又信唔信？
阿虎