醫管局行政總裁何兆煒患上SARS，送入瑪麗醫院深切治療部，唔好話唔得人驚。如果楊永強係對付SARS嘅戰役嘅國防部長，梁智鴻係參謀總長，何兆煒就係戰場司令，好似美國嘅TommyTranks將軍咁指揮攻伊戰事。司令官突然因巡視戰場太多而病倒，好影響士兵士氣。
中午飯局之際，藥王T非常好心兼想得周到，帶齊十樽靈芝嚟大贈送，一人一樽。藥王T話：「請大家注意身體，保持健康，食靈芝確係可以增強身體免疫能力。大家不妨試吓！」大家當然樂意之至，齊讚藥王T好有真正高尚嘅情操。
貿易M接過，猛話好嘢，可以傍身。佢話：「河內現在有四十幾單非典型肺炎，搞到越南政府好驚，唔希望香港人過去。」問佢點解有此消息，貿易M話：「喺河內返嚟香港因SARS而死嘅美籍華人，係美國時裝（牌子）嘅買手，河內方面話，買手唔知自己有事，自香港帶病菌到工廠，傳染畀佢哋，自己返香港急救不治，我兩個禮拜前到過間工廠，聽到呢啲料。」
大家聞言，為之一驚，個個望住貿易M，只見佢面色好好，聲若洪鐘，而且過咗潛伏期，應該冇事。食完飯，返到公司，急急吞番兩粒靈芝丸，臨急抱佛腳都要咯，跟着叫秘書小姐去買空氣消毒噴劑，唔用水嘅皂液。秘書喺中環行到索氣先至買到，間間藥房都話賣清存貨咯喎。