無綫新劇《戀愛自由式》嘅演員，包括女子組合Cookies成員Stephy同Theresa、唐寧、吳啟華女友羅泳嫻同陳文媛（BoBo），噚日喺大口環何鴻燊體育中心泳池拍攝落水戲，各位靚女都要着泳衣拍攝，除咗BoBo因為喺劇中飾演助教，所以唔使着泳衣。
羅泳嫻係咁多個靚女之中身材最好，Stephy同Theresa就瘦到成條柴咁。
Theresa話噚日第一日拍落水戲好驚，因為佢之前唔識游水，為咗呢套劇學咗十幾堂，重要喺劇入面跳水，Theresa話：「要喺成兩層樓高跳落嚟，真係驚到震。」而Stephy就話天氣突然間凍咗，佢落水之後一路震一路講對白，真係好可憐。
BoBo今次扮演長短腳嘅傷殘助教，因為泳隊唔夠人，最後佢都要加入泳隊，BoBo話𠵱家先知拍劇好辛苦，日頭游完水，夜晚又要開廠，所以坐車時會爭取時間瞓覺。
姚嘉妮同男友林祖輝前晚去海運戲院，出席新片《地心浩劫》首映。姚嘉妮話規定咗全家人戴口罩，佢話：「我屋企開藥材舖，八箱口罩都賣晒，今日再定貨，我自己都定咗一箱。我覺得𠵱家只要有兩聲咳嘅人，都應該戴口罩，同男人帶避孕套一樣，負責任嘅人都要用。」問姚嘉妮近來係咪少咗同男友親熱？佢話：「我叫佢冇乜嘢唔好掂我！」
溫碧霞噚日一身低胸套裙，到尖沙嘴出席「2002年度十佳愛心大使頒獎典禮」，吸引大批內地遊客圍觀。問溫碧霞俾人昅到實覺唔覺得尷尬？佢話：「我喺內地一向都有fans，佢哋咁熱情，我都好開心，不過我見有啲人嘅眼光奇怪咗啲，我今日好性感咩？」
蕭亞軒今日喺台灣嘅演唱會，邀請咗蔡依林做嘉賓。蕭亞軒話好多謝蔡依林嘅支持，因為佢哋之前完全唔熟，經過連日嚟嘅綵排，佢哋亦變得老友鬼鬼，蕭亞軒話將來都會義不容辭幫返蔡依林。佢兩個重話大家嘅新唱片宣傳時間差唔多，到時大家可以夾手夾腳一齊宣傳喎。
麥浚龍（Juno）噚日去長沙灣李暉武術文化中心，正式拜李暉為師學習太極，Juno重送上由自己擔任代言人嘅手提電話畀李暉做拜師禮物，而李暉就送番一套功夫衫同鞋畀Juno。
Juno表示今次學太極係為咗配合新歌《玩得》，佢話：「我對功夫同太極好有興趣，成龍同李小龍嘅戲我全部都有睇，我想喺呢方面發展。」
