一年一度嘅七人欖球賽無懼SARS，噚日如期喺大球場擧行，八方重見到英國前首相馬卓安喺貴賓席睇波，重冇戴口罩㖭。八方啲老友問，究竟咁人多聚集，口沫橫飛嘅地方好似馬場、球場，應唔應該去，政府有乜方法保證冇人會因此中招？
呢個真係好難講，入場要買飛，賽會只有準備口罩任攞任戴，但係冇法知邊個係帶菌者。而且連特首都話會如期聽晚六點去大球場頒獎，重怕乜啫，當然老董有臨時唔到嘅紀錄，好似中央圖書館關閉前一日，佢就因為開會冇去到。
雖然幾位打擊SARS嘅先鋒都中招入院，但係主帥老董仍然好Fit，聽講特首辦全層開晒窗消晒毒，一人派一個口罩，至於火酒棉花亦開始有供應，唔怪得冇人中招。
（圖）英國前首相馬卓安果然係欖球忠實擁蠆，無懼非典型肺炎照入場睇波。
傳真︰2623-9278
電郵︰