今日歐洲國家盃外圍賽，焦點應該都係有直播嗰幾場波，而且非典型肺炎肆虐，香港夜市接近癱瘓，波友多數成晚踎喺屋企睇波，香港人最捧場嘅英格蘭作客列支敦士登，肯定係焦點之一。
連梳打埠早揚話都破天荒為呢場超強弱懸殊嘅比賽開盤，相信亞洲各地波友早就摩拳擦掌準備喺各大彩池向英格蘭埋手，不過最後呢個大莊都係開出呢場嘅「亞洲盤」同「首名入球者」兩瓣，想煲英格蘭三比○波膽以上嘅球迷，幫襯佢公司就冇行啦。
話時話始終「亞洲盤」最受歡迎，好似買大細咁一賠一亦夠吸引；但係要中「首名入球者」唔係咁易，大熱嘅奧雲仔分頭都係得兩倍多啲，始終英格蘭除咗龍門外，個個都有機會喺呢場入首球，所以好似我哋名家青蛙仔咁，博吓謝拉特呢類半冷門先有分頭㗎！
公仔箱冇播嘅比賽中，最受注目係意大利主場對芬蘭。意大利暫得四分，不容再失。教練查柏東尼話會好似上場友賽贏葡萄牙咁，繼續仿效皇馬「四二三一」戰陣，不過我求大俠擔心意軍冇施丹同費高呢啲好波之人，實戰運作掂唔掂㗎？今場對芬蘭唔係友賽，因住喎。
德國鋼門簡尼早前就因為識咗個酒吧妹而拋棄老婆，破壞晒形象，重俾傳媒大數不是。最近佢又因為超速駕駛，被罰停牌兩個月！雖然無得揸車都唔係咩事，不過簡尼你話晒都係公眾人物，重係唔少球迷嘅偶像，如果私生活再係咁唔檢點，教壞班後輩就唔係幾好啦。
博洛尼亞歇冬前後判若兩隊，喺聯賽榜已經跌落第九位。前日有班憤怒球迷喺練習場向球員擲雞蛋以示不滿。等我講句公道話，球迷太苛刻嘞，查實喺博洛尼亞今季無咩添兵，人腳有限下，維持喺中游唔算太差，只不過佢哋季初踢得好，搞到球迷對佢哋期望太高啫。
講到荷蘭對捷克場大戰，捷克中場加拉錫就成為咗夾心人，因為佢喺荷蘭搵食，效力勁旅阿積士。不過，加拉錫就話，由於阿積士嘅尹達美迪已經退隊，尹達華特亦多數冇正選，反而阿積士宿敵恩浩雲嘅中場尹邦美就一定會上陣，所以佢到時一定唔會留手，擊敗荷蘭當幫阿積士喺上一場聯賽輸畀恩浩雲報仇。咁都得？
米杜士堡當年因為喺一場英超聯賽以唔夠人數比賽為由，自行押後賽期俾聯賽會罰扣分，搞到要降班。最近，德甲聯凱沙羅頓亦因為被發現喺球會及球員登記牌照方面違反守則，亦要面臨被扣分命運，好彩係由下季開始，否則隨時要步米記後塵。
逢周六、日見報