經紀黃前日佢推介嘅新灃集團（1223）公布業績盈利大升，兼派發高息，小初居然心大心細冇上車，結果走寶。
新灃噚日好醒神，最高見過2.35元，收2.25元，大升20.3%，成交金額848萬元。
雖然新灃稍後更正，話由於打字錯誤，舊年應該係賺8720.1萬元，唔係9573萬元。但經紀黃話冇相干，因為計落都較舊年增加49%。其實最緊要係新灃貨源夠乾，幕後炒家風格夠進取，加上工業股概念呢期又Sell得，所以炒高唔係難，依佢估計，新灃應該未炒完，可以吼位上車，但就要自己執生。
另外，舊年仙股風暴中最大受害者兆晉國際（491），自從換咗新大股東後，股價亦久唔久會郁吓，好似噚日就大升11.8%，收0.019元，但成交就唔夠57萬元。經紀陳話，市場傳聞有人想批股集資，但好似未講掂數，股價偶有波動可能與此有關。
慕容小初