自從藍紙草案出爐，保安局局長葉劉淑儀出席各大小二十三條論壇，舌戰民主派嘅熱鬧場面冇見好耐。今日下晝葉劉終於久休復出，同中大校友談論「《基本法》23條立法對香港教育的影響」。
最近好多公開活動都因為非典型肺炎取消，唔知會唔會影響葉劉今次復出？八方特登致電主辦座談會嘅中大校友事務處問個究竟。到噚日為止，佢哋都話會如期進行，不過以策安全，到時會向與會者一人派一個紙口罩，而座談會嘅地點就由沙田中大校園改到中環中大校外進修學院舉行，原因本來係因為中大當日有太多活動，但係𠵱家分分鐘係因為怕咗肺炎。
到時場面會認真過癮，台下聽眾人人戴住嘅面罩可謂「一罩兩用」，一來防肺炎，二來又可以向封殺言論自由嘅二十三條作無聲抗議。
講起口罩，盈科保險幾日前表示向香港社會服務聯會捐贈一萬三千個口罩，原來已經交晒畀社聯，再轉交畀會員機構老人院嘅老人，咁啱盈保股價近兩日造好，唔通真係好心有好報？盈保呢次反應迅速，唔知係咪同管理層人事變動有關呢？
傳真︰2623-9278
電郵︰