美股周三晚走勢牛皮偏軟，杜指跌50點，收8229。杜指形態仍未能確認轉壞，但港股昨日被肺炎打垮，恒指9000失守後跌勢轉急，大跌174點，收8872。
非典形肺炎搞到香港全城杯弓蛇影，趙飛雲有些少鼻水，喉嚨有啲痕，昨日不敢怠慢即刻去睇醫生，醫生話只係輕微感冒，食藥休息兩日就冇事。不過，就錯過早市追入恒指Put輪嘅好時機，只好歎一句唔係你財唔入你袋。
恒指昨以大陰燭跌穿10及20日線，而且完全填補3月18日上升裂口8976-8901，估計短期升軌8800未必守得穩。港股昨日有一個較利淡訊號，就是公用股跌勢轉急，中電（002）、港燈（006）及中煤（003）約跌2%，較受肺炎影響的公共運輸股跌幅更大，地鐵（066）傳有員工中招，股價大跌4.5%，九巴（062）稍好，亦跌1.9%。持有公用股的投資者多數係長線收息為主，如今亦出現減持行動，反映肺炎疫症已影響投資者對香港的信心。
至於受美伊戰事、油價波動及肺炎3重影響的國泰（293），更是連跌4日，昨日收10.50元，累積跌幅9.5%。母公司太古A（019）亦是連跌4日，昨日收33元，累積跌幅8.8%。昨日沽空榜中，國泰排第1，達1.11億元，太A排第2，金額7399萬元。短期而言，國泰去年9月低位10.50元應有支持，太A32元密集區亦可一守，但估計屬彈完再散嘅格局，唔值得博反彈。
趙飛雲