當年以《四個32A的少女與香蕉少年》一片而為人熟識的唐寧，早前與歐錦棠合作拍攝無綫劇集《牛郎織女》後即傳出緋聞，更屢次被傳媒拍下二人夜會的照片。
日前唐寧在銅鑼灣接受本報訪問時，則一再強調與歐錦棠只屬好友關係，二人還會繼續交往，她說：「我覺得做朋友唔使界定對方係男定女，係乜嘢年紀，朋友出街食飯好正常，嗰次俾人影到，其實又唔係得我哋兩個食飯，但唔使避忌呀，愈驚咪愈係俾人講，我哋都會繼續做朋友㗎。」
問唐寧有否覺得歐錦棠有追求之意？她說：「梗係冇啦，黐線嘅。」又問她會否擔心歐太萬斯敏呷醋？她說：「唔會嘅，大家都係同行，大家知乜嘢事嘅。」
採訪：朱芷瑩 攝影：陳志嵐 服裝及場地提供：Roxy