大市連跌5日，昨日呢鋪勁啲，恒指散174點，5日計埋，總共唔見322點。恒指收8872，距兩個幾星期前低位8757只係高出115點，後市好快又會考驗上次低位。
若然考驗上次低位，估計會守一守，或反彈，到時執啲恒指Call輪博反彈，不過由於中東戰況點發展好難估計，落場買幾手，都要節制，預定有個譜嘅贏輸。恒指Call輪對象，用作短炒，有9711同9663。兩隻Call輪溢價唔細，短炒要速戰速決，磨得太耐輸溢價輸到暈。
最理想係中東戰事快快結束，非典型肺炎風波快快過去。但兩件嘢都唔似好易搞掂，個市有兩座大山壓住，要大好唔易。所以呢排玩Call輪要小心啲，升之時追落去，好易隔兩日發覺已經坐艇，買貨點都要等平啲。
電訊股除咗隻唔跟大市嘅中電信（728）冇跌外，隻隻唔掂，和黃（013）亦係。聯通（762）跌得最多，唔見4.7%，就算再低啲博技術性反彈，都冇邊隻Call輪揀得落手。電盈（008）亦係，隻隻Call輪溢價都不切實際，冇Call輪可作為博反彈對象；另外，電盈業績好差，展望亦麻麻，正股唔睇好，相關Call輪更加咪沾手。中移動（941）好啲，昨跌50仙，收16.40元，若再低至16元以下，諗吓Call輪9754走短線。
章盛