肺炎襲港，人人自危，賭王何鴻燊（圖）噚日教人以後見面要行中國禮，雙手抱拳打招呼就最安全。
而大學教育資助委員會主席林李翹如出席裘槎基金會嘅優秀科研獎頒獎禮時，一見到八方就好緊張咁話要保持距離，一副驚死俾口水浸親嘅表情。
林太佢同八方講，為咗防範非典型肺炎，佢已經有一套應付措施，就係減少同人握手，改為用鞠躬代替，佢重即場從手袋裏面攞個口罩出嚟，話喺必要時會戴上口罩。唔知係唔係啲得獎人收到風，佢哋噚日喺林太手上接過獎項時，都冇主動同林太握手，避過尷尬場面。
另外，申訴專員戴婉瑩噚日同兩名調查主任一齊開記者會，唔知係咪俾肺炎事件嚇親，三人噚日輪流發言時，支咪就係咁換來換去，場面都幾搞笑。佢重同班記者行家講，有問題就盡量喺記者會度問晒佢，有乜嘢唔明就打電話畀IO，唔好圍住佢嚟問咁話喎。戴專員都幾識保護自己。
傳真︰2623-9278
電郵︰