東亞銀行香港仔利東邨商場分行有一名職員懷疑染上「沙士」，東亞立即將間分行關門休息二天，進行消毒，叫職員放假七天留意身體。好嘅銀行管理，唔需要下下問政府（金管局）攞指引嘅，總要識得臨陣應變，隨機應變，見步行步，以顧客及職員嘅健康為第一考慮，至於生意影響，只屬其次。左丁山認為東亞銀行不幸成為第一間俾「沙士」襲擊嘅銀行，應變得好快，值得佢啲客仔與股東拍掌。
賓架C為拗而拗，實行腦震盪，佢出咗一條題目畀我哋諗：「假如某間銀行中環總行嘅櫃台職員（teller）在工作時間發現中招，係唔係要暫停總行服務？」
中環總行唔同分區細分行，關門七天，影響甚大，呢條問題確實令管理層好頭痛！賓架L話：「金管局可唔可以發指引呢？」左丁山就覺得香港人慣咗賴地硬，樣樣嘢都要問政府攞指引，你班銀行家、校長、公司高層讀過咁多書，人工高過人，除非法律硬性規定啫，點解董事要問政府攞指引？金管局啲人係全港最聰明，最有應付「沙士」經驗嘅咩？當然唔係，面對非常時期，要以職員與顧客健康為首要考慮，職員放假休息七日，休嘅辦法（病狀潛伏期）可安定人心，係忍痛犧牲生意嘅辦去，即使中環總行也要如此。
「沙士」就係香港今日嘅恐怖分子，受到恐怖襲擊，應變計劃就要出籠，賓架P話：Theshowmustgoon!商界嘅危機管理力能將備受考驗。