香港今年經濟可能復甦無望，非典型肺炎肆虐，可能令香港陷入蕭條局面，大行紛紛準備將香港經濟增長預測調低。港股噚日再挫174點，收報8872。
今次肺炎疫症，屬於天災，港人呢一鋪真係要認命，基本上冇乜官員可以怪，如果真係要怪，惟有怪阿董黑仔，唔知阿董使唔使效法古人下召罪己（說笑而已，請董生不要見怪）。
國泰（293）承認受到肺炎擴散影響，導致乘客量減少，現正考慮減少航班。股價噚日出現拋售潮，最多跌逾6%，收報10.50元，跌4.5%，成交接近4億元，其中沽空超過1億元。ｅ莉莎大讚個客叻，周三清完倉後，周四即有其他基金跟住沽，早知個客眼光咁準，當日點都借啲貨沽空。
不過，黑客提醒阿虎，大戶沽國泰唔一定同肺炎擴散有關，可能與盈富基金（2800）即將調整投資組合有關，因為滙豐（005）要發行逾10%新股收購HouseholdInternational，如果發新股後股價冇大跌，市值將大增，盈富要增持滙豐，減持其他藍籌股，調整組合比重。現時市況低迷，若盈富要在同一日內完成調整組合，平時成交唔太活躍嘅藍籌股，例如國泰等隨時會俾盈富質低10%，所以噚日有唔少芬佬偷步出貨，等待盈富沽貨時再撈底。
中意控股（1198）兩名主要股東以每股1.05元，配售1000萬舊股畀惠理基金及李嘉強。由於基金以8.25%溢價入股，市場隨即憧憬有得炒，噚日復牌逆市急升13.4%，收1.10元。據Cookie話，中意稍後可能重會有動作，幕後會炒多一轉至會進行有關交易，但要炒到乜水平，佢就話無可奉告。
阿虎