特區呢鋪真係威震全球，接連有外國歌手同欖球隊怕咗非典型肺炎，唔敢來港。都係埃塞俄比亞政府夠膽識，噚日仍然按計劃派駐京大使來港，舉行埃塞俄比亞榮譽領事館開幕酒會，真係風水輪流轉咯。
人哋咁畀面，律政司司長梁愛詩同中國外交部駐港特派員吉佩定，點都要出席，雖然酒會人頭湧湧，佢兩個都冇戴口罩。Elsie（梁愛詩）話出街戴唔戴口罩要睇情形，雖然律政司辦公室有口罩可供索取，佢重好自信咁話，「我唔覺自己有需要戴。」
八方就覺得Elsie此言差矣，因為話口未完，Elsie離場時就畀記者追住問二十三條立法嘅進度，搞到佢要費盡唇舌解釋，話喺呢個場合唔講得二十三條，你話如果Elsie戴咗口罩幾好，咪唔使講咁多囉。
（圖）梁愛詩（左二）同吉佩定（左）到賀埃塞俄比亞香港榮譽領事館成立。右為駐京大使巴萊馬，右二為埃塞俄比亞香港名譽領事吳宏斌。
傳真︰2623-9278
電郵︰