麥皮、豆腐雖是平平無奇，但背後卻原來蘊藏着一個孝女的故事，Eleanor就是這故事的主角，她為了媽媽的健康，就利用以上平凡材料，創製出兩個愛心健康菜式，令媽媽因而不再為「血壓高」而煩惱。想感受愛女為媽媽精心炮製的愛心菜式，即刻有得跟住學。
記者：陳冰麗 攝影：陳陶鈞
逢星期一至五刊出
三年前Eleanor的媽媽馮老太，因為膽固醇及血壓偏高，以致不能再放縱食慾，醫生勸喻最好不要再吃煎、炸、味濃的菜式，偏偏馮老太卻不能忍口。為了媽媽的健康着想，Eleanor惟有狠心對待，即日起禁止烹煮煎、炸餸菜，由她親自下廚，每日菜餚均以清淡的菜蔬、豆腐、蒸魚為主。連續一星期的蒸煮入餚，Eleanor苦心的策略並不可行，相反，馮老太卻因為不能接受淡口菜式，而令胃口變得愈來愈差。
Eleanor退而求其次，參考市面不同食譜書，希望從中有所啟發。結果發現原來麥皮是最適宜老人家吃的一種價廉、高纖、低脂食品，Eleanor更資詢醫生意見，得知麥皮還有降低膽固醇、有效預防便秘的功效。
於是她便鎖定麥皮為原料，炮製新菜讓媽媽品嘗。「最初因為唔識控制麥皮份量，結果搞到杰撻撻；試過就咁加啲鹽、葱去煮，但媽咪都嫌太寡；亦試過加多少少肉碎及蛋花在內，但都不討好。」可以成功鑽研出而深得媽媽歡心的雜錦鹹麥皮，Eleanor坦言都經過五、六次的失敗。
知道媽咪忌甜食，加糖加奶的傳統食法一定接受不了，於是就創製出這款麥皮鹹食法。芋頭、冬菇等香口料，可增加麥皮的香口感，而且亦是媽咪的至愛，再混合多種有營養的雜豆、雞肉同煮，令麥皮既有肉味，亦有芋頭香味，難怪馮老太一試即愛。雖然未至於餐餐食，但至少每星期總有兩日會食阿女炮製的愛心麥皮，馮老太重話，食咗麥皮，膽固醇及血壓偏高現象已有改善，現在更毋須再定時要食藥的煩腦。
冬菇 3-4隻
雜豆 適量
麥皮 3碗
免治豬肉 6両
雞髀肉粒 3両
芋頭粒 4個
上湯 3碗
葱粒 少許
在安老院工作的Eleanor，一直都知豆腐好啱老人家食，所以用豆腐做菜，難度便沒有如麥皮般高。要令無味豆腐變得惹味可口，最緊要味道配搭恰當。Eleanor就先將豆腐配以瑤柱絲及金華火腿粒蒸熟，令豆腐先吸收瑤柱絲的鮮甜及金華火腿的鹹香味，再淋上一個混合有肉又有菜的芡汁在豆腐面，令賣相不致太寡，亦能增添口感。
蝦肉 4両
雞髀肉粒 3両
瑤柱 4-6粒
新鮮蟹肉 適量
布包豆腐 1磚
冬菇 3-4隻
葱粒 少許
金華火腿 少許
菜梗粒 隨意
馮老太：
我都八十幾歲囉，唔知食乜？自己膽固醇過高卻又唔戒口，好在有乖女炮製麥皮我食，家陣至唔使愁。我淨係食鹹麥皮，呢個加有芋頭在內嘅麥皮就更香口。