黃秋生喺《無間道》因為表現出色，所以近排有好多人搵佢拍戲，估唔到連王家衞都睇中佢，要搵佢客串《2046》。日前馮仁昭打電話問過秋生，佢好出奇咁問：「咦！你點知㗎？」秋生幫王家衞客串《2046》兩日，答應係咁易收番封利是。原本佢度咗期畀澤東電影公司，但因為套《2046》暫時都未拍到秋生啲戲份，所以佢都唔知幾時開工。
今次秋生客串拍六十年代嘅戲份，澤東公司一早已做定戲服畀佢，秋生肯客串，聽講係《2046》嘅主角梁朝偉出面同寰亞老闆林建岳借人，咁偉仔開到聲，林建岳同秋生都畀面。呢部戲遲吓會再去泰國同上海拍外景，不過木村拓哉就唔會再返嚟拍嘢，因為木村嗰邊覺得佢嘅戲份已經喺泰國拍晒。
陳冠希（Edison）日前去咗成都為一個食品公司宣傳，大會為Edison嘅安全着想，安排咗大約二十個保安維持秩序，場面墟冚。
Edison旋風式到訪成都，大受歡迎，佢由搭飛機開始不停俾「罰抄」，Edison話：「空姐見到我都叫我簽名，當到達宣傳會場，就算上咗年紀嘅中年商家，佢哋都走嚟問我攞簽名，見到佢哋咁熱情，我都好開心。」
周杰倫同徐若瑄呢對緋聞情侶，雖然女方一直唔承認，只話大家係傳短訊同打電話嘅普通朋友，不過近日台灣《壹週刊》就有報道話徐若瑄瞞住周杰倫同F4成員吳建豪秘密拍拖，而喺今個月十二號，吳建豪重夜訪徐若瑄位於忠孝東路嘅香閨，重話吳建豪無視周杰倫呢個情敵，亦冇打算退出呢段三角戀，令呢段三角關係撲朔迷離。
噚日有人傳真去報館，要無綫藝員李國麟欠債還錢，否則後果嚴重。
馮仁昭即刻打電話追問李國麟，問佢有冇爭人錢，佢話：「有，又供樓又供車，梗係有欠銀行錢啦，而且層樓重係負資產㖭！但我就冇借過財務公司錢，平時亦唔賭錢，呢件事我都係第一次聽到，相信呢啲係惡作劇。」不過，聽講無綫最近都有收到呢份傳真。
早排譚詠麟（阿倫）喺港台大數日本天后濱崎步唱歌唔掂，結果步姐所屬嘅Avex唱片發聲明指摘阿倫言論過份。噚日步姐歌迷會「AyumiHamasakiABestHKFanClub」發咗封投訴信畀香港電台台長，指摘當時節目主持梁繼璋任由阿倫話步姐唔應該得最受歡迎日本女歌手獎，有破壞公平之嫌，重話梁繼璋唔知係咪以權謀私喎，重鬧佢哋打擊外資來港投資嘅信心，真係講到好嚴重咁喎！
現代版嘅《皆大歡喜》一直都係原班人馬拍番，不過噚日有消息指馬蹄露因為遲到太多突然被飛出《皆》劇，由劉玉翠擔演佢嘅角色。噚日見到劉玉翠入廠拍《皆》劇，佢話：「今朝珍姐（曾勵珍）打電話畀我，問我可唔可以即刻返工，咪即刻返囉。」同劇演員謝天華，對於馬蹄露被飛，佢話：「我都係今朝先知。」問佢究竟馬蹄露遲到嘅情況係咪好嚴重？佢話：「冇乜嘢都唔會咁！」
