GBA機能強橫，遊戲質素出色，好多機迷都當佢係部手提超任咁看待。不過有時遇着好Game，想大玩特玩一輪時，都因為部機同個芒都咁細，長時間咁玩都幾辛苦。任天堂進一步擴大GAMECUBE跟GBA嘅連動關係，推出用GAMECUBE玩GBA帶嘅周邊GameBoyPlayer，恍如令機迷家中添置一部超任咁正。
記者、攝影：徐影龍
ImageGirl：小蕙
喺電視度玩GameBoy遊戲係唔少機迷嘅夢想，之前Game舖曾出現過幫人改機駁電視嘅服務，不過由於要拆散部GBA改，兼唔可以還原，始終吸引唔到人。任天堂官方推出嘅GameBoyPlayer就方便得多，最大特色係接駁至GAMECUBE後，便可插入新舊GameBoy帶喺電視上玩，恍如一部超任咁。
好處除咗Game畫面得以放大外，重避免GBA唔夠光嘅問題，畫面變得清清楚楚，就算玩《惡魔城》都唔會叫苦連天喇。透過GAMECUBE本身影音輸出功能，不但可接駁到大電視上顯示，若本身接駁嘅擴音機支援，更可以ProLogic作環迴音效播放，雖非真正5.1輸出，不過音效包圍感點都好過立體聲，而且扭大重低音，保證有前所未見嘅臨場感受。
目前GameBoyPlayer只提供紫、銀、黑同橙四隻色，襯番部同色GAMECUBE可說天衣無縫。至於其他顏色主機及PanasonicQ則未有，當然亦大可玩撞色效果。
GameBoyPlayer並非只玩到GB帶咁簡單，重提供多項新加功能，作調校之用。如內置二十款唔同圖案嘅邊框、放大縮小畫面、改變手掣設定等，最頂癮係定時響鬧功能，設定後便會定時通知你夠鐘，Hold住個畫面唔畀你玩落去，最啱家長限制小朋友打機嘅時間。筆者推斷任天堂透過更新GameBoyPlayer開機碟，往後大可加入更多功能及邊框選擇。
其實GameBoyPlayer意義唔止係放大畫面同駁音響咁簡單，筆者就認為當中重有三大好處可發揮：
1.100%靈活玩盡動作Game
基本上GBA玩大部分嘅動作Game如《FinalFight》都冇問題，不過一玩《電流棒》、《拳皇EX》及《GuiltyGear》等Game時，十字掣真係唔多適合。利用GAMECUBE手掣上嘅AnalogStick控制，情況完全兩樣，打格鬥Game時使出複雜連續技都冇問題。
2.攤喺梳化長期煲機
GBA上有唔少RPG、SLG名作，如《FFTAdvance》、《超級機械人大戰》等，呢類Game出名食時間，玩起上嚟又唔捨得停，卒之打到頭都痛埋。有咗GameBoyPlayer，大可舒舒服服攤喺梳化度慢慢打，畫面又大又光，真正享受打機嘅樂趣。
3.自製精采爆機動畫
咁辛苦打爆機，梗係想錄低佢留念。以後機迷大可利用GABECUBE嘅AV線，接駁至錄影機或具AVIn插頭嘅電腦，自行製作動畫片段。不但各類精采爆機動畫，甚至終極連續技、真．三一萬能俠攻擊動畫等都可製作專輯，相當好玩。