最近有朋友向我推介一間有明星飯堂之稱嘅酒家，佢話雖然酒家位置較僻，但有唔少明星好似譚詠麟、任達華、李克勤、洪金寶都鍾意去觀瀾打完Golf之後嚟呢度醫肚，佢重向我推介咗幾款最受明星歡迎嘅菜式，其中除咗招牌菜燕鮑翅之外，重有其他特色小菜，豐儉由人，想親口品嘗明星菜話咁易！
記者：黃希知、歐嘉荃
攝影：偉信
ImageGirl：Irene
譚校長出名識飲識食，難怪呢款每啖都係翅嘅至尊乾撈翅會成為佢嘅至愛，條條翅都粗針又晶瑩通透，大廚話全部都係老闆專誠由香港運到的一級南美洲金山勾翅。用上湯、火腿汁、自製海鮮汁以乾撈食法品嘗，每份再附送一小盅加入瑤柱汁嘅上湯，食時伴以清湯，魚翅入口變得更爽滑，食得夠晒刁鑽，最高紀錄可以日賣四十客。
明星食評：
魚翅真材實料，份量足，師傅自製嘅汁好惹味，魚翅入口爽滑之餘蘸滿汁香，同普通嘅紅燒魚翅食法好唔同。
在眾多菜式中，論最花功夫同時間，呢款花膠遼參都算第一，因為只係將花膠同遼參浸水發起就要三日時間，花膠會選用較靚嘅印尼公肚，而遼參則來自日本，加入自製鮑魚汁扣四十五分鐘，最後放入鵝掌，鮑汁加上花膠、遼參，菜式有幾矜貴可想而知。
明星食評：
花膠同遼參都幾有份量，兩樣都煮得幾腍，幾彈牙，唔會漿住個口，其實兩樣都無乜味道，不過加埋個鮑汁調味後就真係無得頂。
總覺得燕窩只可以用來做甜品，原來做菜同樣大受歡迎，而且唔單止吸引女仔，就連任達華都一食鍾情，來貨都要萬幾蚊一斤嘅印尼特級燕盞點食先最正？「燕窩本身無味，所以我用清雞湯、上湯同自己用最靚嘅金華火腿熬製嘅火腿汁調味，金華火腿特登由浙江省金華苑訂返嚟，一訂就訂幾噸。」總廚江師傅表示。每份燕窩都有二両半，份量都算多，任達華咁識得養顏之道，呢款燕窩自然成為佢嘅至愛。
明星食評：
我最鍾意就係食燕窩，雖然四百幾蚊咁貴，不過啖啖燕窩入口的確過癮，而上湯唔太鹹，但又充滿好香嘅金華火腿味道，每次嚟我都一定要食番個先走。
呢隻一個頭有成斤重嘅南非鮑魚，真係有成大半隻手掌咁大，雖然只係新鮮鮑魚而非乾鮑，但製作過程同樣繁複費時。新鮮游水鮑魚由香港運返，原隻以火腿、老雞、赤肉等多種材料扣足十個鐘至入味，咁大隻鮑魚要扣得好最講求火候控制，控制得好做出嚟嘅鮑魚就會有鮮味又軟滑。
明星食評：
鮑魚嘅件頭同我身形不相伯仲，咁大隻鮑魚都煮到好腍、好嫩滑，重好入味㖭！
將成粒日本乾瑤柱釀入開邊嘅一級大花蝦內，成道菜嘅精髓在於清淡嘅鮮甜蝦味同瑤柱濃郁鮮甜味做配搭，淋上由上湯、金華火腿汁、蝦子調校成嘅清汁，三種鮮甜味融為一味，爽口蝦肉、煙韌瑤柱做出雙重口感，加上賣相精緻，係江師傅嘅自創傑作之一。
試食報告：
賣相精緻，第一次見到簡直唔捨得食，兩款唔同嘅海鮮配搭起嚟幾有新鮮感，不過我最鍾意先食瑤柱，後食大蝦，感覺特別正。
每間酒樓都有自家嘅小炒皇，大多數都大同小異，材料配搭差不多，但用幾種新疆同雲南野生菌加豬頸肉，呢個配搭我反而覺得幾新鮮，由白靈姑、雞髀菇、雞樅菌同茶樹菇為首，加入爽口豬頸肉，配以自家用十二種材料秘製嘅醬汁炒香，味道香濃得來帶點微辣，愈食愈惹味。
試食報告：
喺深圳好多地方都有菌食，不過以野生菌配豬頸肉都幾特別，我最鍾意係個醬汁，啲菇吸晒醬汁嘅辣味，食落口好惹味。
負責人隨手攞咗幾本相簿畀我睇，原來裏面全部都係明星嚟食飯時同老闆、員工嘅合照，原來除咗譚詠麟之外，好似電視藝員楊玉梅、李香琴都係熟客仔，話係明星飯堂真係無講錯。
身為酒家總廚嘅江師傅，十六歲就巳經跟隨當時富麗華酒店香滿樓總廚梁廷基學煮燕鮑翅，「我之前做過麗都酒店、江門橋都大酒店、佛笑樓，前前後後都做過十幾間酒樓、餐廳同茶室。」江師傅說。
酒家設於四星級廷苑酒店入面，位處於遠離深圳市嘅龍華鎮，同觀瀾高爾夫球場只距離二十分鐘車程，所以唔少明星波友都係呢度嘅常客。酒家望落好似唔係好大，原來係設計問題，因為老闆將大半面積間成十八間唔同大小嘅包房，而三樓則改成宴會廳，畀客人擺酒和開酒會用，呢度勝在夠偏僻，夠晒隱蔽！
金泰酒家
電話：(86)75528128888
地址：深圳市龍華鎮人民北路33號廷苑酒店2樓
營業時間：上午6時半至凌晨3時半