奪命肺炎搞到全港人心惶惶，班高官一直都死撐唔戴口罩見人，唔知何志平係咪前日去完有人中招嘅中央圖書館，噚日率先打破高官唔戴口罩嘅先例，戴住口罩出席立法會有關民政事務嘅特別財務委員會，重引發一場搞笑版嘅SARS肺炎恐慌。
話說何志平會上係咁講民政事務局嘅使費，一直講咗十幾分鐘都唔停口，講到氣咳，點知佢呢一聲咳，令到全場議員、其他官員都好緊張，「眼金金」咁望實佢，惟恐佢感染咗肺炎咁，何志平就即刻講「對唔住」，重補飛話：「我冇病㗎我！」然後拉開口罩飲啖水止咳，搞到哄堂大笑。何志平又話政府實行問責制後個個高官都收到「大信封」，又引來一場誤會，大家以為佢講嘅係炒魷，原來佢講嘅係收到講各部門開支預算嘅Envelope（開支封套）。
（圖）何志平前日去完有人中招嘅中央圖書館，噚日即刻戴番個口罩開會，「一枝獨秀」。 黃冠華攝
傳真︰2623-9278
電郵︰