近期大家為咗非典型肺炎，搞到個心囉囉攣，有病都唔敢去公家醫院，帶挈私家醫務所生意。蘭西收到料，荃灣區有唔少私家醫務所四圍搵舖，有啲快將租約期滿，原本唔打算續租嘅，都改變態度。
美聯舖位部助理營業董事黃金鳳同蘭西講，荃灣青山公路富裕樓地下十八號舖，約三百五十方呎，租期至今年五月屆滿，租客原本唔打算續租，但非典型肺炎爆發後，令佢改變初衷，有意續約兩年。間舖現時月租五萬，續租租金約四萬五，雖較其他有意洽租嘅醫務所低，但業主考慮到續租唔使提供免租期、代理佣金等，所以平啲都制。
黃金鳳又話，由於多咗醫務所喺荃灣區搵舖位，出價變得好積極，有啲畀到月租六萬至七萬蚊，比市值高一成至成半，又指明要做二十四小時㖭！香港人真係唔放過每個搵錢機會。
非典型肺炎觸動全港市民嘅神經線，人心惶惶。𠵱家經濟已經唔好，重遇到致命怪病，好多打工仔就算傷風感冒都唔敢放假，擔心冇咗份工。中記噚日出指引，如果員工有家屬「中招」，又證明到有接觸過，就送七日有薪假畀員工，等佢安心休息。另外，聽講牛頭角淘大花園「中招」嗰幾名中，有一位係地產代理。
卓先地產下禮拜二舉行銀主拍賣會，推出九項住宅，全部都係大嶼山愉景灣單位，佢哋講今次以愉景灣做主題，原因係同區近期冇新盤開賣，可以減少競爭，增加賣出機會。
愉景灣不嬲都吸引外國人士進駐，卓先過去拍賣愉景灣單位，都有外籍人士承接，佢哋重派人喺愉景灣碼頭派單張做宣傳。
講番呢批銀主貨，面積由533到889方呎，除咗1間外，全部都係海景單位，開價最平58萬，最貴都係115萬。卓先話今個禮拜日重會搞開放日，等啲有興趣買家可以實地睇樓。
最近非典型肺炎擴散緊，離島似乎比較安全啲喎，唔知對拍賣成績有冇幫助呢？
舊年底由田家炳基金買入嘅屯門力善多元化工業城，原計劃改建成青年教育文化同娛樂大樓，但因為技術問題而擱置，現已翻新，易名田氏廣場，正在招租，收入更會全數作慈善用途。
負責租務嘅中原工商部高級營業經理黃啓成話，田氏廣場總樓面約一百三十萬呎，全包呎租兩個四至三蚊，每月總租金收入約三百萬，扣除差餉、地租、管理費後，淨呎租個半至兩蚊，較同區物業呎租三至四個半平。大廈每層五萬幾至七萬幾呎，係區內罕有巨無霸工廈，已有公司洽租作寫字樓同貨倉。
美伊戰事爆發已超過一個禮拜，中原（中國）深圳分行總經理李耀智話，喺香港賣嘅深圳新盤未因此受影響，成交量重有增加㖭，以質素較高的樓盤銷情最好。
另外，由中原代理，中海地產發展嘅中海深圳灣畔，共有1240個單位，至今已賣咗近七成，當中港客佔40%。舊年重攞到「2002年深圳樓盤龍虎榜十大樣辦樓盤」。
發展商重保留部份向世界之窗高爾夫球場景嘅單位，喺下個月推出發售，計劃向買家提供最高達4.4萬嘅優惠。
蘭西
電郵地址：
