小初近日為肺炎擴散發愁，噚日上到股票行都冇乜心機炒股票。經紀黃話，小初真係有錢都唔識搵。
小初問經紀黃發掘到乜嘢寶藏咁巴閉？經紀黃喺部股票機㩒出4個數字，就係新灃集團（1223）。
新灃噚日公布02年全年業績，賺成9574萬元咁多，比起上年大增64%，除末期股息外，重派特別股息，加埋成17仙。
經紀黃話，自從新灃舊年被裕元（551）同新灃嘅前董事成功敵意收購後，隻股嘅街貨真係乾到不得了。此外，裕元、信星集團（1170）兩隻鞋股，家陣PE造緊11倍以上，新灃現價相對便宜，如果有基金睇中，分分鐘升到你唔信。
新灃噚日跌4.59％，收1.87元，但成交稀疏，唔夠22萬元。小初即管睇吓經紀黃今鋪估唔估得中。
另外，靜咗一排嘅中國數碼信息（250）噚日又見異動，升2.93%，收0.211元，幾乎上番今年高位，但小初覺得隻股實在位高勢危，都係睇戲好過。
慕容小初