喺每部主機都例炒嘅《機戰》今集自然都走唔甩，由於代理俾日本Cut單關係，據聞所有舖頭只係獲分配原訂貨嘅五分一數量，所以行貨定價$399嘅《機戰》，好多地方第一日炒到上$550。真係唔怪得廠方出續集出得咁密，咁嘅價錢旺角好多地方都賣清光。今日到貨嘅日本版連特典DVD，日本定價7,980日圓，但係相信會賣成$650左右，至於限定版就約$750先有交易。
上星期講過GC隻《P.N.03》唔夠貨，雖然隻Game出面嘅評語好壞參半，但星期一推出時好多地方都冇貨，到今日相信要成$320-$330先買到，至於第二批行貨就要足足兩星期之後先到，等唔到就要捱貴貨喇！
一直傳咗好耐嘅GBASP行貨，喺上星期終於到港，今次代理萬信引入嘅係110v日本版加上香港保用證，至於220v就要等機電處批核先出得街，現市價亦回至$950左右。靜咗一排嘅XBOX行貨賣大包，最新定價$1,599連《JetSetRadio:Future》同《SEGAGT2002》，XBOX行貨《SoulCalibur2》就會有水杯等特別贈品附送，4月4日發售。
文：打機鐵人