𠵱家啲後生仔，郁啲就喊打喊殺，明明自己有錯，轉頭係都要攞番個彩至得，講緊嘅唔係邊個樂壇偶像，而係塞內加爾國腳迪奧夫。
早前足協盃八強首回合，利物浦作客些路迪時，向對方球迷吐口水嘅利物浦前鋒迪奧夫，已經俾球會罰款及俾歐洲足協罰停賽兩場。但佢似乎重未識死，最近就話如果事發地點唔係球場，而係喺街上面嘅話，佢肯定唔止向嗰個挑釁佢嘅球迷「放飛劍」咁簡單，直情行埋去打佢㖭。
正所謂「忍一時風平浪靜」，以為你迪奧夫經過呢次事件學到嘢啦，點知重係咁執迷不悟。我求大俠知道蘇格蘭警方重查緊呢次事件有冇涉及刑事成份，勸迪奧夫你都係講嘢小心啲，咁大個仔成熟啲啦。
近日聽坊間有人高呼禮拜六烏克蘭主場受讓西班牙半?一，要瞓身博下盤。咁筍？於是我求大俠即刻去求驗，原來只係某個大莊開個未受注嘅初盤係咁，其他受緊注嘅網根本就係烏克蘭受讓平?半，足足爭兩個價位，所以話初盤咪亂信。另外，我求大俠唔明點解𠵱家重未見大莊開意大利對芬蘭嘅初盤。計正呢場波開球半，應該兩邊都有人幫襯啦。
雖然今屆意大利盃有AC米蘭同埋羅馬雙雄入四強，但唔代表呢個盃賽受重視。意足總早兩日先落實準決賽次回合響下個月十五日踢，其實呢個盃賽已經唔係第一次改期，今次係為遷就一個大型音樂會。足球盃賽因為就音樂會而改期，恐怕足球大國中只有意大利會咁樣。
利華古遜今季沉淪不起，就算護到級，睇嚟季尾都幾難留得住陣中部份主將。其中土耳其「好波之人」爾迪雷就放晒風聲話走硬咁滯，最希望去意大利搵食，叫英格蘭球會可以對佢死心。咦？一直話想簽佢嘅羅馬咪好大機會？咪住，爾迪雷重話一定要有歐冠盃踢至會考慮，羅馬都係諗過第二個啦。
最近我哋中國嘅孫繼海似乎冇乜球運，喺曼城已經唔能夠好似季初咁保住個正選位置，上一場對車路士重俾球證出示兩面黃牌趕離場，英超前途亮起紅燈！我求大俠就覺得大家唔使擔心咁多，事關最近一間體育用品公司準備同曼城合作喺內地開舖，擺到明食「老孫」嘅號召力，照睇曼城唔會咁蠢放走呢個運財童子啩？