港股又破位而落，10日同20日線失守，今次再考驗低位支持，約在8750水平，除非美伊戰情對聯軍有戲劇性的利好進展（暫時呢個可能性好微），呢條「好友防線」守唔守得住，真係冇乜把握。
美軍今次企圖速戰速決，點知遇到頑強抵抗，好在知錯，立即增兵，補給線雖然冇被截斷，但已陷入苦戰。雖然打落去，都係一個結果，但呢場仗愈拖得耐，對美英愈不利，世界經濟復甦，又唔知要拖到何年何日。
恒指低收8872，大跌174點，成交67億元，期指低水擴大。香港衰起上嚟，有紋有路，「人和」變咗「人禍」，天時地利亦冇埋。
一場非典型肺炎嘅天災，搞到香港人人自危，本來賴以帶動經濟復甦的旅遊業，更加首當其衝，飲食業生意亦一落千丈，香港重要衰幾耐，真係天曉得。高人話過，舊曆3、4月會有天災人禍（指疫症）、血流成河（指中東），金融市場波動好劇烈，股市更會大跌。佢提醒投資者，千萬唔好掉以輕心。
國企繼續成為資金避難所，指數有1點進帳，幾隻重型股都屹立不倒。上海石化（338）業績靚，收1.33元，升3仙，若非遇啱大跌市，股價反應相信唔會咁保守。上石化舊年營業額217億元人民幣，升10%，獲利9.16億元，大升6.9倍，單以第4季計，獲利已4.29億元，估計03年盈利仍可保持高增長。
百江燃氣（8132）紋風不動，平收3.225元。在業績宣布後，百江股價明顯轉強，守穩在3條短期平均線之上，短線阻力在徘徊區頂部3.35元，衝破後可重上4.0元水平。
百江去年營業額11.5億元，增長14%，獲利1.33億元，升逾3倍，每股盈利21.97仙，PE14.6倍。公司今年將繼續向管網建設及液化石油氣兩方面發展，後者則加強零售業務，估計整體毛利率可比去年的22.7%進一步上升。
集團今年將落實及啟動5至8個新的內地燃氣管網項目，總投資達10億元，保證收益增長。估計03年盈利2.4億元，上升80%，每股盈利38仙，預測PE降至單位數字，中長線可持有。
郭兆誠