聖誕新年熱鬧過後，XBOX除咗隻《HALO：最後一戰》外似乎冇乜動靜，雖然傳聞五月嘅E3將有大搞作，不過要喺呢段真空期Keep住曝光率，行貨惟有再次推出套裝優惠。賣價雖維持$1,599不變，不過就包含兩款世嘉大作，抵玩度非常高。
記者：徐影龍
優惠套裝以世嘉遊戲為主題，當中包含兩款受歡迎大作，分別係《SEGAGT2002》同《JetSetRadio：Future》，兩者前作喺DC上都甚有名氣，可玩性高之餘亦甚有收藏價值，今番搭埋XBOX一齊賣，價錢重維持$1,599不變，計番條數部XBOX重平過GAMECUBE，相信可進一步吸引心思思又未買機嘅玩家。優惠套裝包裝上除貼上兩款遊戲嘅貼紙外，Game都會預先放喺XBOX盒內，不過要注意係兩隻Game會一次過收錄喺一隻DVD上，千祈咪誤會代理大意跟少一隻Game。而盒面就採用雙封面設計，開機時喺主畫面度揀就玩得。
若你咁貪心嫌優惠套裝仍未夠吸引，送多盞XBOX超靚Disco燈又點睇？呢盞燈當初行貨推出時曾派出小量畀機迷，好多機主一心想買都撲個空。今次《打機樂園》再次有獨家優惠畀機迷，只需今天5:00pm至8:00pm，手持本版報道到灣仔東方188商場門口，就會有個XBOX人幫你蓋印，之後到場內任何一間Game舖一口氣買XBOX優惠套裝再加一個手掣，攞住張單同蓋咗印嘅《打機樂園》去搵XBOX人，頭50個讀者就可以免費得到呢盞燈。呢盞燈成本差不多要成$250，計吓計吓部XBOX已經平過部手提機仔GBASP，重想點？