CAPCOM著名製作人三上真司，繼《生化危機2、3》推出GAMECUBE移植版後，最新搞作《P.N.03》竟然係玩科幻動作Feel。主角嘅動作甚為古典優雅，殺敵時十足十跳緊舞咁，夠晒新意。據官方網頁所講，《生化危機》畀人一種「黑色」嘅感覺，而《P.N.03》就刻意係「白色」，明顯有黑、白兩瓣都殺晒嘅野心。
記者：徐影龍
逢星期一至五刊出
遊戲類型：動作射擊
對應機種：GAMECUBE
遊玩人數：1人
開發商：CAPCOM
售價：$320
可能三上真司玩咗咁多年喪屍有啲悶，居然諗咗隻玩跳舞攻擊嘅動作Game。雖然呢隻《P.N.03》基本上屬動作射擊類型，不過主角完全唔會出現咬牙切齒嘅暴力場面，相反其動作一切以優美表現為主，除最常用嘅PALMSHOT屬較為單調嘅射擊外，其他動作如迴避、翻觔斗等都優美過人，最誇張係眾多嘅必殺攻擊ENERGYDRIVE，跳一大輪舞先發射氣功波攻擊敵人，彷彿當敵人冇到咁，而且殺傷力大，招招攞命，名副其實笑裏藏刀嘅攻擊。
動作表達夠晒搶眼，系統亦有唔少新意思。主角穿着嘅戰鬥服名為AEGISSUIT，遊戲內總數會出現十一件唔同設定值嘅AEGISSUIT（包括兩件隱藏衫），每件都可以分數作有限度升級，如連射速度、防護力等。隨住遊戲進度會出現三種級數嘅AEGISSUIT，全部都有唔同顏色配撘，能力值亦不盡相同，啱晒鍾意有舖儲嘢癮嘅機迷。
每次完成任務，都有練習模式畀你揀，主要係漫無目的咁殺敵賺錢，即係話只要有時間不斷咁練習，就可以買齊咁多款AEGISSUIT兼全部LevelUp，擺到明想延長隻Game嘅耐玩度。
成隻Game九成戰鬥場地都係一間又一間細小嘅密室，玩家要活用室內地形及障礙物，一邊避開敵人攻擊一邊前進，所以熟習主角所有迴避動作相當重要。雖然你有本事大可跳過所有敵人去另一間房，不過就難以賺取分數去買嘢同升級。影響分數多寡，主要以過關時間、殺敵數量去計算，完全冇受傷重有額外Bouns㖭。
姿勢重於實際
玩爆Easy或Normal難度後，就會出現HardMode及附送第一件隱藏AEGISSUIT「BlackBird」，呢件衫所有數值已升至最高級數，攞佢嚟打HardMode會輕鬆得多。不過筆者玩爆一次後感覺好悶，故事薄弱唔在講，遊戲內冇分支路又冇過場動畫更冇多重結局，幾難引人花時間儲分數，而且結局係自爆裝置啟動前離開，加上爆機後追加勁武器，似乎三上真司擺脫唔到《生化危機》嘅影子。《P.N.03》精粹在於靈活避過敵人攻擊，喺戰場上巧妙咁走位的確幾過癮，而且以NoDamage狀態過關可以攞更多分數，相信可吸引部份機迷去研究。
又到送禮物時間，CAPCOMHK預留咗100張特大Size嘅《P.N.03》海報畀《打機樂園》讀者。老規矩攞住今日呢版，到灣仔東方188商場嘅DreamStore就可免費攞到，當然係送完即止，先到先得喇。
地址：灣仔東方188商場256號舖
電話：25753285