人誰無錯，我求大俠幾時都話應該畀機會嗰啲犯過錯，但有心改過自新嘅人，但係英超球證韋利就似乎冇呢份容人之心，結果就可能搞到惹官非。
上周日愛華頓作客對阿仙奴，客軍喺下半場換入鄧肯費格遜嘅時候，電視評述員安迪格雷就話，聽到執法球證韋利當時特登走埋去提醒旁證，叫佢哋睇緊啲阿「鄧生」嘅一舉一動，事後愛華頓方面表示可能會為咗韋利呢種態度而告佢。
如果韋利真係有咁講，咁就對鄧肯費格遜唔得公平嘞。雖然鄧生以往惡名昭彰，重因在場內頭撞對手坐監，但都要畀個機會佢重新做人至得㗎！咁樣針對性嘅執法態度，我求大俠都支持愛華頓要告到韋利甩褲囉。
其實，安迪格雷曾經係愛華頓球員，佢咁樣為愛華頓球員講嘢，亦唔知有冇偏幫而夾硬屈韋利呢？
富咸擒日公布季尾唔同領隊泰簡拿續約，我求大俠真係擔心下屆佢哋球員會鳥獸散。泰簡拿上任成為富咸領隊之後，簽咗好多法國仔返嚟；計落有馬列、馬白蘭基、列雲斯基同迪捷圖等等，佢哋見連老細都企唔住腳，重唔拿拿臨搵定後路咩。話時話，佢哋軍心咁唔穩，喺未來兩個月同佢哋比賽嘅球隊，想唔贏都幾難。
早幾日，皇馬個主席佩雷斯講過，隊中已經容納唔到碧咸呢種踢法嘅球員，但係佢哋個體育總監華丹奴前轉頭又謂，碧咸仍然喺佢哋今夏嘅「一年一度大收購」名單之中。一個球會兩種說法，你叫人信邊個好呢？我求大俠就知道皇馬喺買賣球員呢方面，華丹奴嘅話事權都幾大，不過，兩隊就嚟喺歐冠軍盃碰頭，皇馬先嚟擾敵呢招唔奇！
上個禮拜布力般領隊桑拿士表示，希望正式收購目前以帕爾馬借將身份效力嘅後衞基斯高。點知上周六布力般慘敗紐卡素一比五，基斯哥嘅「甩甩漏漏」演出，再加上一個烏龍球，可以講係罪人之一。唔知係咪咁，帕爾馬即刻話希望布力般快手買咗佢。嘿嘿，畀我係桑拿士，就真係要再諗諗先嘞。
呢排表現一落千丈嘅溜馬，最近突然盛傳將會簽前熱火老將添夏達威，雖然呢位老將戰力今非昔比；不過以我求大俠分析，溜馬今次其實醉翁之意不在酒，佢哋好可能想利用「老添」嚟睇住班唔聽教嘅𡃁仔，尤其係有狂躁症嘅阿達斯，睇嚟溜馬教練湯馬士深明我哋中國人「家有一老，如有一寶」嘅道理。
逢周一至周五見報