近日市民紛紛搶購口罩，甚至出現賣斷市的情況，查實你又知唔知口罩可以分為以下幾種？紙口罩、紗布口罩、布質口罩、醫學用口罩同埋工業用口罩。紙口罩、紗布口罩、布質口罩、醫學用口罩多數都是呈長方形及以平面設計，但人面有弧度，所以四邊都有罅隙，防護程度無咁高；至於近期成日掛嚮嘴唇邊的N95，就係工業用口罩，以杯形設計，加上鼻樑部份有金屬條固定位置，設計較貼面，防護程度亦相對提高。
不過不同類型的口罩就有不同程度的阻力，帶上口罩後同時會增加呼吸阻力，根據勞工衞生組一份有關拋棄式口罩之資料，紗布口罩阻力比較少，所以吸啖氣都易啲。N95呢類口罩防護性的確係高，但呼吸阻力增加，戴得耐或唔舒服嘅話，記得除落嚟唞啖氣。你話「如果我重未買口罩，咁究竟買邊種口罩好？」就視乎你要唞氣要順，還是高度防菌囉！
記者：招佩珊