小初噚日通街撲口罩之時，經紀陳有電話殺到，話建滔化工（148）同依利安達（033）股價一齊有異動，似乎有料到，唔知雙方係咪最終情投意合，打算發展進一步關係？
建滔噚日最高7.40元，收7.25元，成交金額突然大增至4716萬元，依利安達雖然一度升至1.16元，但收報1.13元，只係微升唔夠1%。
由於噚日建滔公布業績，加上依利安達股價又回軟，起初重以為建滔只係炒業績，炒派息增加，冇乜大不了。
不過，收尾睇真啲，原來建滔唔驚唔覺已增持依利安達超過23%，而依利安達嘅主席兼主要股東，又喺噚日由執行董事轉去非執行董事職位。雖然話就話公司搵咗位猛人坐鎮，但兩件事加埋，又確係唔尋常。
經紀陳收市又打電話畀小初，話早在2月中時，佢已經向小初推介呢兩隻股，重話建滔股價高處未算高，依利安達亦可留意，𠵱家兩隻都中晒，要小初請佢食飯。小初有錢賺，自然冇問題。
慕容小初