三月二十三日馬場舉行打吡大賽，眼見會員席入場人數比平時多，打吡叫做有啲刺激作用。打吡賽日好多兩倍左右嘅大熱門，精英大師、喜勁寶、電子麒麟、勝威旺、雀躍都分別勝出，只有一隻五戰不敗嘅「步步速」，一點幾倍竟然倒灶跑第四，而左丁山偏偏就全日最大注買落呢隻馬度，輸到條氣都窒晒。到咗公布第九場，左丁山照《蘋果貼士》買「勁歡騰」，只見大摩馬房隻「勝利來」搏命落飛，好似贏梗咁款，好彩，「勝利來」去到終點以為會贏之際，影相輸條頸畀「勁歡騰」、「必得勝」、「紅旗飛揚」，跌落第四，投注此駒身上者，乜都輸晒，有馬迷大呼好好好！「步步速你都輸得，呢場你就落飛想食晒，抵死！」至於「你」係邊個，大家心照咯，左丁山中番「勁歡騰」補數，自然心涼。
講番場打吡，雌馬「勝威旺」輕易取勝，贏八百一十二萬元獎金，配種價值大增，假如明年贏埋國際賽香港盃，睇怕會立即退役返澳洲配種，為馬主賺大錢。馬主夫婦捧盃時，身穿紫紅衫頭戴紫紅帽，與騎師綵衣一模一樣襯到絕！同係名門之後，夏佳理主席隻「駿河」就令人失望啲，有點兒物非所值。
時值非典型肺炎當道，大家入馬場仍然態度輕鬆，唔怕人多混雜。不過跑到第十場，沙圈有一位女馬主戴咗口罩，相當穩陣喎，用望遠鏡睇真啲，位馬主似係大富豪龐熊少珠（龐鼎元夫人），佢隻馬「金枕」係大冷門，全無機會，龐太體育精神好，明知隻馬輸梗，都戴住口罩落沙圈，抵讚。