早前廣州爆發非典型肺炎時，趙飛雲已覺得相當唔妥，以中港人流來往之密，香港隨時會中招。最慘係香港不但中招，而且在出現疫症初期，班議員同高官淨係顧住「杜松」及「護松」，全無危機感及不識事分輕重，趙飛雲忍唔住講咗幾句，話非典型肺炎肆虐，後果可大可小，如果一旦擴散，搞到人人都要戴口罩，香港變成口罩之城，估唔到今次變成烏鴉口，好嘅唔靈醜嘅靈。
如果今次病源真係來自內地，咁真係唔知幾時可以斷尾，現時惟有寄望能盡早製成特效藥及預防疫苗，中大及港大兩批專家，請繼續努力。
美股周二晚初段跌至8180，再獲雙底頸線8158支持反彈，收8280，回升65點。正如周一分析，杜指未跌穿8158前，形態上只可視作後抽。
港股昨日早市跟隨美股反彈，但市場氣氛受肺炎擴散影響，恒指反覆回落，最後微跌15點，收9047。期指明日結算，好友看來底子仍厚，除非有特別利淡消息，例如美英聯軍又再中伏大量損兵折將，否則淡友似乎不易質穿9000支持位，不過一旦失守，則跌勢會轉急。
中移動（941）正如所料，反彈受制於17.50元附近，近日兩度上試17.60元不破後出現回吐，如按建議沽出套利者，暫不用心急補回，可候回試短期升軌支持（現處16.30元）守穩後才買入第1注，以15.30元止蝕。
趙飛雲