古天樂、陳慧珊及任達華對患非典型肺炎人數不斷增加深表關注，下月初古仔原本要到廣州宣傳新片，但經理人擔心古仔受感染，計劃取消行程，而任達華則認為，新加坡處理非典型肺炎十分決斷。
非典型肺炎在港不斷擴散，前晚古天樂、陳慧珊及任達華在銅鑼灣時代廣場出席雜誌《BInternational》的頒獎活動時，亦表示十分關注目前情況，他們都會購買口罩，以防不時之需。
古仔稍後將要返回內地宣傳電影《失憶𠝹女王》，若情況繼續惡化，他更可能會取消行程。
前晚獲頒發傑出成就獎的古仔說：「呢個禮拜五（即明日）我會去新加坡登台，雖然嗰邊都發現有非典型肺炎個案，但我唔係好擔心自己受感染，因為當地政府都做足準備，我都唔係咁擔心。」
兩星期前古仔自廣州拍完廣告返港後，便因為感冒和發燒而要立刻去看醫生，古仔說：「我都驚中招，所以即刻去睇吓醫生，驗過之後，知道唔係肺炎先安心啲。我以前都試過肺炎入院，重喺醫院住咗成個禮拜，因為當時我體內有隻菌好厲害，搞到我幾日退唔到燒，過咗成個禮拜情況先穩定，所以我對肺炎真係有啲怕。」
古仔續道：「中國星想我返廣州同北京等地為《失憶𠝹女王》做宣傳，如果內地非典型肺炎持續惡化，到時我可能會取消行程，當然如果冇事，我梗係想返去做宣傳啦！媽咪已經買咗口罩畀我，過幾日去新加坡登台，我會戴口罩上機，又會帶備藥物以防萬一。」
任達華前晚亦批評政府處理非典型肺炎反應太慢，他說：「呢隻肺炎菌咁厲害，影響市民健康，政府開會都要開成四粒鐘，人哋新加坡夠決斷，受感染嘅病人規定唔可以出街，新加坡政府反應就快過香港政府啦！我老婆已經買咗十個口罩，等出埠時就可以用。」
至於陳慧珊為了預防非典型肺炎，早已購下五十個口罩，她說：「禮拜五我同古仔及羅嘉良去新加坡登台，到時我會戴口罩上機，但怕唔怕受感染，我就覺得都唔擔心得咁多。」
採訪：何永寧
攝影：何國豪
