個市浮上浮落，算係窄幅波動。重磅藍籌中，太A（019）跌幅大過大市，收34.40元，唔見60仙，拖累隻Call輪9475由22.2仙散落18.2仙，冇咗18%。
太A5月7日除息90仙，9475冇息收，5月底到期，溢價0.9%，槓桿率18.9倍，假設正股除息冇升冇跌，隻輪實際溢價係3.6%，槓桿率係18.4倍，有咁大槓桿率，咁嘅溢價唔算貴。若見太A再落些少，可以撈啲9475博反彈，但要有心理準備正股上落經常無從觸摸，隻輪一兩日之間升跌20%好閒嘅事。
建滔（148）炒業績，由6.60元彈上7.25元，帶動公司輪602由1.08元彈上1.38元，升28%。602今年年底夠鐘，負溢價1%，槓桿率5.3倍。單睇數據，隻輪相當抵買，不過要留意正股已經上咗好多，驚住會有回吐。畀啲耐性，有平貨先至諗。
非典型肺炎涉及中旅（308）1間酒店，肺炎亦可能影響旅遊同酒店生意，中旅昨反升2仙，收1.18元。公司輪763收5.1仙，升11%，3年後到期，溢價7.7%，槓桿率23.1倍，吼低至買。
中電信（728）升1仙，收1.40元，股價一向穩定，唔易大跌，或跌後都會反彈，不過隻隻Call輪都好貴，買輪不如買正股。
章盛