外號「飛魚王子」嘅方力申，最近秘密接拍雀巢檸檬茶嘅薄荷新口味廣告，聽講個廣告喺東南亞某熱帶地方取景，下月中就會喺電視首播。廣告商所以搵方力申做代言人，就係貪佢形象夠健康，又係游泳健將，重出咗七位數字請佢拍廣告。
方力申日前去髮型屋理髮，同助手行過尖沙嘴一間便利店時準備買飲品，而方力申為咗尊重廣告商，雖然佢代言嘅薄荷味檸檬茶重未上市，但就買咗同牌子嘅罐裝檸檬茶解渴。
方力申日前話：「我可以講嘅係我好鍾意呢個牌子嘅飲品，平時都經常買嚟飲。不過至於講到係咪拍廣告做代言人，呢啲嘢我一向交畀經理人公司處理，或者佢哋遲啲會有公布。」
採訪：比華利 攝影：林德雄
黎姿同梁敏儀噚日喺銅鑼灣為新戲《無冕天使》拍外景，黎姿唔使埋位時就即刻拎個口罩出嚟戴，梗係驚咗啲非典型肺炎啦！
黎姿話之前託個做空姐嘅朋友喺澳洲買咗批口罩返嚟用，不過因為唔夠用，所以前晚又去咗藥房入貨。
佘詩曼噚日出現喺清水灣電視城，對於有報道指佢翻𠝹張智霖一事，重話阿佘用口水整落張智霖度，佢顯得好激動咁話：「一開始拍《西關大少》時都預咗有人寫，但估唔到咁離譜，以前一直唔出聲，但今次第一因為影響個人衞生，第二係𠵱家非典型肺炎由口水傳染，會影響我形象，加上人哋有女朋友咁多年，點解要影響人哋，同埋點解要針對我。」
陳雅倫噚日喺助手同律師陪同下，去咗灣仔地方法院出席聆訊，事緣佢喺舊年曾經畀咗一半定金一位攝影師去美國影相，但後尾因為天氣關係取消，而佢就追唔番筆定金，結果雙方要對簿公堂，噚日未有判決，下月九日再上庭。
彭丹同張慧儀噚日喺大角嘴一拳館拍攝電視電影《女拳皇》，彭丹話佢前日喺上海返港，知道香港爆發非典型肺炎，佢話喺內地亦染上肺炎，彭丹話：「足足病咗四個月，只係普通肺炎，唔係非典型嗰隻，初時係急性，後尾轉為慢性，𠵱家已經好番晒。之後使咗兩萬幾蚊，買健康藥品進補，增強抵抗力。」
