香港係大都會，走在潮流尖端，衣着以至手電都好快出新款，其實住宅建築都有潮流，中原執行董事張奕威（圖二）話，大約十年一個潮流。
張奕威指出，50至59年以冇𨋢嘅唐樓為主，十幾層有𨋢物業開始新興，現時銅鑼灣禮頓山一帶嘅舊樓係例子。到60至69年以大角嘴文英樓為代表，開始興荔枝角美孚新邨嘅模式。70至79年屋苑式物業開始大行其道，代表有薄扶林置富花園，豪宅首推碧瑤灣。
80至89年，規模大、設施多兼交通便利嘅太古城，成為主流，新冒起嘅豪華屋苑有城市花園同和富中心。90至99年樓市係豪氣年代，用料極力講求質素，甚至連新界樓都唔輸蝕。代表有中半山帝景園同鴨脷洲海怡半島，高逸華軒呢一款開始冒起。
到咗00年開始呢十年，又興啲乜樓呢？張奕威估計係超高住宅，重未必全部都係豪宅級數，最為人熟悉就係紅磡海名軒同尖沙嘴擎天半島。
和黃青衣服務式住宅藍澄灣，啱啱至開始吹風，但代理已急不及待協助造勢，分析區內市況。
中原地產助理營業董事周永輝話，今年截至本月二十三號，青衣區總共錄得457宗租售成交，主要集中喺盈翠半島、翠怡花園同珀麗灣呢幾個盤。估計藍澄灣推出，會成為區內樓市焦點。
現時區內樓價，如盈翠半島每呎2600到3300蚊，翠怡花園就係接近兩千蚊。藍澄灣值幾錢呎呢？周永輝就冇提到，可能係等大家估吓。
𠵱家零售市道唔好，商場大業主就更加要搞多啲花招吸引消費者，地鐵旗下商場，在農曆年之後又變身，啱啱就換咗「春裝」，其中九龍灣德福廣場更利用大大小小嘅風鈴，達到糅合視覺同聽覺嘅美妙效果。
商場除有色彩鮮豔嘅壁畫，重有好多唔同形式、用唔同材料造成嘅大大小小風鈴，最大一個高20呎，合奏出悅耳樂韻。
青衣嘅青衣城就用蝴蝶同花譜出蝶戀花舞曲，微風吹過就見蝴蝶隨風飛舞嘅姿態。
但係𠵱家香港正受非典型肺炎困擾，唔知啲消費者有冇心情去逛商場呢？
證監會公布房地產信託投資基金諮詢文件。仲量聯行搞論壇，探討吓呢種投資模式在港的發展方向，有成二百名高級行政人員出席。
較早前，仲量聯行一份研究報告指出，亞洲區嘅房地產信託投資基金正處於萌芽階段，但前景就要睇業主同投資者態度。
仲量聯行話，若果能成功推行，將可以鞏固香港作為亞洲國際金融中心地位。
房地產信託投資市場最初喺美國成立，但要超過三十年至起飛，跟住嘅澳洲就用咗二十年以上，所以亞洲區若果要成形，都要一段時間。𠵱家亞洲區只係得日本、南韓同新加坡有呢種投資基金。
非典型肺炎不斷擴散，港人談之色變，好多人擔心居住嘅大廈有住客中招，令自己都受到感染。但原來唔係個個人都咁諗嘅。
有代理行業內人士同蘭西講，佢座大廈有一名住客喺政府醫院做醫生，要接觸非典型肺炎病人，最後重中招㖭，好在位醫生已一早送咗啲仔女去第二度住，不致全家受害。不過，呢名業內人士就話冇有怕，一啲都唔擔心。但蘭西心諗，香港就嚟俾呢個病搞到亂晒大籠。
蘭西
電郵地址：
