日本女星松隆子，早排俾人傳同效力紐約楊基（NewYorkYankees）棒球隊嘅球手松井秀喜拍拖，重搭阿爸阿媽交情信畀松井，講到似層層，不過噚日日本報紙踢爆，原來松隆子同棒球手嘅拍拖消息只係煙幕，佢嘅真命天子其實另有其人。
咁係邊個成功奪得松隆子嘅芳心呢？據《NaitaiSports》報道，呢排松隆子同古裝片《武藏》嘅主角市川新之助行得好密，佢兩個不時俾人見到喺東京目黑區同廣美區嘅高級餐廳撐枱腳，而且態度親密，十足十蜜運中嘅戀人！查實松隆子同市川新之助大家都係出身自梨園世家，背景簡直襯到絕。
可惜嘅係市川新之助早前俾人揭發原來有私生女，而且又傳過同米倉涼子拍拖，我羅拉就覺得市川新之助今次擺明一腳踏兩船，認真唔啱，如果松隆子同米倉涼子為咗呢個男人面左左，就更加無謂啦！
講番松隆子嘅煙幕情人松井秀喜，原來佢最近同電視節目主持人逸見愛拍拖，聽講逸見愛係主持體育節目，可謂近水樓台先得月！