所謂「人老精、鬼老靈」，咪睇紐卡素領隊卜比笠臣成七十歲人，佢不知幾咁識得幫球會慳錢，用低價買啲好貨返嚟。
紐卡素上半季嘅稅前盈利雖然有成一千一百幾萬鎊，但係佢哋領隊卜比笠臣就講明唔會亂使錢買人。咁啱喺呢個時候，葉士域治因清盤關係，被迫要賤價賣走大量球星套現，而卜比笠臣見機不可失，就拿拿臨用一百萬鎊執咗佢哋嘅英格蘭二十一歲以下國腳中場岩布斯。
我求大俠就認為，葉士域治今次肯將十九歲嘅岩布斯賤價賣畀紐記，純粹係畀面卜比笠臣，事關卜比笠臣二十年前教過佢哋同埋喺季初幫襯過佢哋買巴布爾。之但係，人哋肯賣，都要有老笠咁精明先得㗎！
禮拜六、日同埋下星期三都係國際賽日，好多個國家本土聯賽都要讓路，畀球員返國家隊集訓。之不過，「開咧」無耐嘅中國甲A聯賽就反行其道，不單如期進行，重一連氣打兩場。我求大俠知道友賽雖然意義唔大，但中國隊𠵱家有幾個國腳係歐洲搵食，好應該善用呢個賽期，好似日本咁去唔成美國，都搵烏拉圭頂檔，點解中國成個月都搵唔到對手？
國際足協會長白禮達突然間發炮，指摘英格蘭領隊艾歷臣友賽澳洲時，用正副選隊各踢半場制度；艾歷臣亦反駁友賽目的係志在練兵，勝負係其次。我求大俠聽完後，絕對贊同艾歷臣講法，友賽當然係用嚟試陣試新人，況且班球會老細又向佢施壓，踢殘班球員分分鐘下次以傷為理由，唔畀球員出戰重麻煩，白禮達咁講真係幫唔落喎。
皇家蘇斯達禮拜日畀維拉利爾臨尾連入兩球迫和，搞到佢哋門將韋斯達維特嬲到紮紮跳，佢話自己喺歐洲搵食咁耐，最渣嘅球證都係西班牙咁話，同時又暗示啲球證總係偏幫皇蘇嘅對手。我求大俠就話，皇蘇教練丹路爾斯早就講過呢個問題，應付方法係繼續沉着應戰；韋斯達維特不如學吓教頭咁，或者對隊波有益啲。
拉素前鋒S恩沙基雖然啱啱離婚，但好快就找到第二春，而最新消息話佢搭上咗佢阿哥嘅舊女友薩曼莎。S恩沙基今年成二十八歲，拍拖都好正常嘅事，但係佢今屆多災多難，啱啱喺前個禮拜至傷愈復出，轉個頭又傷番；所以我求大俠奉勸佢現階段以事業為重，與其花時間溝女，不如乖乖地養傷同操返弗狀態好過。