大記者揸住兩張非典型肺炎預防藥方，唔知邊張好，於是打電話搵人請教，沙田名中醫話：「最緊要身體好，睡眠充足，便好預防，唔使食藥；要加強免疫能力，不如用黑靈芝、龍眼肉煲瘦肉湯，多飲無妨。」中環著名老牌藥行就對大記者話：「好難講邊張藥方掂，我哋啲人客揸唔同藥方嚟執藥，起碼成十種藥方，各有所好，所以呢排生意好好。」
既然莫衷一是，睇怕日食靈芝，唔怕蝕底。但沙田名中醫話至緊要睡眠充足，就令左丁山諗起，啲醫院醫生，尤其是實習醫生，好似要經常當更三十六小時，平時睡眠嚴重不足。唔怪得威爾斯醫院咁多醫護人員中招。雖然老一輩醫生經常話：「我哋當年都係咁。」但諗深一層，當年係咁，今年未必要一樣，實習醫生或初級醫生點解要如此辛苦？
諗深一層，二十幾年前，香港人口冇咁多，醫生大晒，病人面對醫生，完全冇發言權，醫生所面對嘅公眾壓力，可說係等於零。但今日點同呀，人口近七百萬，外來人口大增，病人權益膨脹，醫生權威性大減，更不時俾電台臭罵，報紙痛批，今日醫生所面對嘅專業壓力，社會人士壓力，輿論壓力，遠非老一輩醫生當年做學師時所能想像嘅。既然醫生做得咁長時間，是否人手唔夠呢？但醫學院新畢業生又可能冇工做噃，呢個社會嘅矛盾實在太多，左丁山唔識唔明。