東洋今期興懷舊
菊川怜拗到盡追殺紀香

日本嘅女藝人，成日俾人批評佢哋嘅衣着同打扮一窩蜂，潮流興乜就周街都係，完全冇個人風格可言。好似最近日本突然吹起一陣懷舊風，唔止過氣廣告天后藤原紀香「扮老」出現公開場合，呢輪喺雜誌都成日見到一個個大鬈髮加熊貓眼嘅女星，愈誇張就愈搶眼。

乙葉暴其短
好似新廣告天后菊川怜都趁吓熱鬧，一向打扮都係走正派美女路線嘅佢，最近幫一本時裝雜誌影相時梳咗個七十年代「青春火花」頭兼袒胸露臂，對佢嚟講，都算幾突破。菊川怜最後重嚟一招誘惑拗腰，差啲跣到件DKNY裙越過「警戒線」，睇到fans心跳加速，我羅拉都戥佢抹一把汗。
不過唔係個個都啱試新嘢，好似乙葉都幫人做model扮野女孩，但睇見佢嗰對加料熊貓眼，我羅拉真係不敢恭維，佢件衫重暴露咗佢身材矮小嘅缺點，真係唔扮好過扮。

吉川變娃娃
我羅拉真係覺得日本商人都好話頭醒尾，見到有懷舊潮即刻推出畀人着嘅Barbie公仔懷舊服，重搵咗吉川日奈影番輯相，以吉川話晒都係九頭身美女，着出嚟都有咁上下水準。