上周二董太接受香港電台普通話台《南北樂逍遙》節目訪問，大講自己絕對唔係好母親、好祖母，噚日港台播出訪問嘅下半集，董太趁機為自己平反，佢話自己唯一好處，就係「一個好好嘅奶奶」，非常痛錫媳婦，連佢個新抱都同人講，話佢奶奶OK喎。
之但係上一集董太爆料，話媳婦湊仔唔多講究衞生，連佢個理髮師都睇唔過眼，問佢點解見個孫玩啲唔多乾淨嘅鎖匙都唔理？咁做醫生嘅新抱都話「唔怕，大蟲食細蟲！」董太點好意思過問。家陣非典型肺炎肆虐，唔知董太同新抱有冇聽陳署長同楊局長話，要注重個人衞生時常洗手，改吓湊細路方法？
跟住董太又為Complain解畫，有嘉賓同董太講，喺電視上見到佢元旦日執垃圾個樣好𤷪𤺧，嚇到董太連聲抱歉，話𤷪𤺧只因「愛之深」，又解釋唔知自己嗰日上緊電視。吓？當日電視台咁大個攝錄機同大大支咪對住佢，董太唔通以為係垃圾桶同雪糕筒？佢又補充話，除咗鬧，都有讚，佢話班「精英」義工令佢「熱血好奔騰」。
﹙圖﹚「我係一個好奶奶！」設計對白
傳真︰2623-9278
電郵︰