本港感染非典型肺炎的市民不斷增加，地產代理因為要接觸唔同嘅客人，是高危一族，美聯物業就話已採取措施，防止中招，向員工發出衞生署指引、加強分行通風設施嘅清潔次數、使用消毒劑清潔電話、同埋增加分行大規模清潔次數。又勸喻員工注意個人衞生，一旦有呼吸道病徵就要戴口罩。
旗下香港置業，每日會喺公司內聯網，發放非典型肺炎最新消息，好似剪報、政府最新公布同相關網址，等員工可以掌握最新情況。
利嘉閣亦透過公司內聯網，發放有關非典型肺炎嘅消息同指引，重將中藥藥方公諸同事。
員工除注重健康保住命仔，亦擔心飯碗，怕啲客擔心被傳染，唔敢睇樓。美聯因此訂咗十萬個口罩，今日先免費派三千個畀啲客，等佢哋可以安心睇樓。美聯對蘭西講，啲口罩係外科醫生做手術用嘅型號。中原就訂咗逾五萬個，派畀員工同睇樓客。睇嚟呢排撞口撞面都係口罩黨。
由和黃同長實合作嘅青衣服務式住宅，已定名為藍澄灣，預期四月取得售樓同意書，上半年可以賣。近年合作項目多數由長實負責賣樓，今次就一反傳統由和黃孭飛，重特別出書，介紹集團歷史，同持有物業資料，如下圖係香港仔中心嘅前身香港仔船塢。
藍澄灣共有1585個單位，面積由640至960方呎，年輕買家係主要吸納對象。售樓統帥係和黃地產副董事總經理徐建東（圖三），近年主力搞內地項目，佢同蘭西講已有多年冇賣香港樓，對上一次係海怡半島，相隔有八年，因此四出參觀熱賣樓盤偷師，將軍澳廣場係其中之一。
令人聞之色變嘅非典型肺炎肆虐香港，敲響港人關注身體健康嘅警號，番禺祈福新邨都算先知先覺，佢哋祈福醫院入面嘅藥膳坊，利用多種唔同藥性嘅中藥，炮製出各種美食，近排重結集成書（圖四），圖文並茂，介紹超過四十種藥膳食療嘅煮法同功效。中醫相信肺炎係因為肺熱，書裏面有唔少清熱潤肺嘅湯水同甜品食療，啱晒𠵱家人心惶惶嘅香港人，總之有病醫病，冇病強身。
長實高級營業經理郭子威話，噚日有一名中港兩地經商嘅科威特人，初步用一百萬美金，計劃喺本港置業，洽購畢架山一號第十座相連單位。
呢名準買家經營服裝生意，喺內地入貨返家鄉賣，由於生意伙伴喺香港，佢一個月總有一、兩日留港，加上中東局勢唔穩定，索性在港買番個單位自住，畢架山一號又近火車站，方便往返內地。
郭子威話，該名科威特商人呢幾日到咗內地辦貨，預計返港後可落實成交，據了解，除自住之外，個客重有意再買多間做投資。似乎美伊戰事，可以令香港樓市受惠。
為宣揚大廈管理重要性，沙田區議會屬下工作小組，舉辦「沙田區優質大廈管理比賽」，共有三十六個屋苑參加，分四組共十二個獎項，富城集團就攞咗其中四個，沙田第一城同錦泰苑齊獲冠軍，嘉田苑得季軍，而世界花園就攞到嘉許狀。
聽講每個參賽屋苑都要提交資料，由工作小組評審，並會到屋苑實地考察，睇吓同資料有冇出入。呢個係區議員了解地區事務嘅途徑之一。聽富城講，佢哋公司舊年共攞到百四個獎項。
蘭西
電郵地址：
