英國歌手RobbieWilliams嘅言行一向出位，佢早排應承英國嘅慈善節目《ComicRelief》做啲特別嘢，幫佢哋籌款，早幾日亦有報道話佢會喺鏡頭前赤裸裸咁坐喺度，佢呢個舉動真係連馮仁昭都俾佢嚇一跳。
喺節目裏面，起初個畫面只係影住Robbie個樣，但之後個鏡頭慢慢移落下面，跟住就見佢喺佢洛杉磯間豪宅入面，坐係梳化度，唔使講佢就梗係全身赤裸啦！但奇怪嘅係佢嘅子孫根竟然唔見咗，淨係見到一個神秘三角地帶，不過睇真啲就發現原來Robbie係將佢嘅重要部位收埋喺兩隻腳中間。
其實佢呢個甫士都唔算創新，因為喺經典電影《沉默的羔羊》入面，飾演探員克莉絲嘅茱迪科士打（JodieFoster），誓要捉到嘅變態殺手水牛比爾都玩過呢招。比爾喺戲入面有場戲就將佢嘅何B仔收喺後面，扮女人跳舞，咁講法，唔通Robbie好鍾意睇《沉默的羔羊》？
男子組合Boy'Z噚日幫TommyHilfiger喺尖沙嘴行天橋，點知有個四眼仔fans好想見到Boy'Z，就走去扮記者。佢入記者區時，有工作人員叫佢出示證件，佢就話自己係雜誌記者，工作人員見佢咁閃縮，就趕佢走。原來Boy'Z一早就知道有呢個四眼仔，因為佢之前喺霆鋒記招出現過。
朱慧珊同珈潁噚日喺亞視總台出席「三月慶生會」，珈潁着低胸裝出席，鬼咁性感。活動重送出一對紅鯉魚，最後俾朱慧珊抽中，佢話：「好好運，我會寄養喺我家姐個大魚池度。」問朱慧珊收唔收到朋友送嘅生日禮物，佢話：「冇呀，不過我就買咗條金手鏈畀自己。」
新人趙頌茹（阿Yu）噚日去咗港台接受直播訪問，雖然近日有港台DJ錢佩卿患上肺炎，但阿Yu話一啲都唔擔心會俾人傳染，因佢一向有戴口罩。阿Yu重話佢媽咪都喺醫院做嘢，佢覺得病痛呢家嘢係避無可避嘅！
組合Shine嘅徐天佑同黃又南最近搬咗新屋，佢哋嘅經理人公司想畀多啲私人空間佢哋，得閒可以留喺屋企作曲，免得佢哋住喺Cookies附近會惹緋聞，所以佢哋嘅經理人Amy安排咗又南搬去北角，天佑就搬去尖沙嘴，每人住嘅單位都有七百呎，租金約萬二蚊，全部由經理人公司畀。
麥浚龍（Juno）噚日去香港網球總會舉行嘅記者會，推廣網球活動。Juno除咗識得跳舞外，原來運動都好叻，佢話：「係啊！以前有打網球，又係足球隊隊員，不過因為我打網球，成日打親人個頭，踢足球又鏟親人，所以就開始少打，轉去游水同打乒乓波。」
