小初近排炒業績，華瀚生物製藥（587）已趁高沽出套利，而亞洲鋁業（930）雖然有錢賺，但仍繼續揸住，諗住可以睇高啲。經紀陳就話，佢唔反對小初繼續揸住亞鋁，而且可以翻炒華瀚。
小初記得，在0.90元水平買入華瀚，在公司公布中期業績賺4000萬元後，就在1元樓上沽出套利。隻股之後曾跌回1元樓下，但唔夠幾日就彈回1元樓上，噚日微升唔夠1%，收1.04元，睇嚟班大陸炒家頂得好行。
經紀陳話，華瀚股價守得住，雖然可能係大陸炒家未散完貨，但聽聞公司稍後會有收購消息公布，所以唔排除班大陸炒家高位沽完後，低位又掃番，想借消息炒第2轉。
經紀陳似乎言之有理，小初唔敢亂駁嘴，但就覺得華瀚班大陸炒家，炒作手法同一般大陸炒家有多少唔同，似乎比較閃縮，唔同海爾中建（1169）咁大上大落，成交大有氣勢，所以就算翻炒華瀚，只會係小注怡情。
慕容小初