最近經朋友介紹，去咗一間喺深圳市嘅室內溫泉，說來這裏浸溫泉，倒不如說是浸浴，因這裏並沒有天然的溫泉水，而是用蘆薈、人參、當歸等天然植物製成不同療效的浴池，一個價錢可以任你浸。還可以睇戲、按摩兼免費過夜，一條龍玩足二十四小時。
記者：黃希知 攝影：林監琛 ImageGirl：Cathy
逢星期一至三、五刊出
每位客人都必須換上拖鞋和店方供應的睡衣，才可在店內的範圍活動，超過七萬多呎的面積共分為兩層，一樓全層是男女浴池，經過浴池就可以去到二樓，活動室、餐廳、酒吧和靜休區都設在此。
行勻全個場，呢個旋轉池就最過癮！望落好似一個大型洗衣機，池水不停旋轉，Cathy見到即大叫得意要親身試一試，「一坐落去，啲水係咁沖過嚟，感覺好舒服，浸咗差不多五分鐘，上池後發覺全身的肌肉鬆晒，成個人都好Relax。」
見到坐浴區擺放了幾個寫住丹草堂嘅大木桶，問負責人係乜東東，原來係畀客人用嚟沖雲南排毒藥浴。雲南瑤族人經常用呢種中草藥嚟沖涼，以四十度熱水連同藥包浸泡最多半個鐘，靠出汗達到排毒作用，有助入眠和幫助消化，連防治皮膚病都得，藥粉每盒?58。
這裏的另一賣點，就係呢個仿日式設計的室外溫泉，為咗令效果更似天然溫泉，店方用日本草津溫泉的天然硫磺礦石粉做成溫泉水，一樣有健康療效，最驚喜係隨時會落起人造雨，將周圍營造成露天雨景一樣，效果真係好得意。
除咗旋轉池外，呢個人參浴池特別吸引我，用韓國鮮參嚟浸浴我都係第一次見，池邊流出嘅熱水流經放喺膠箱裏面嘅鮮人參，用嚟沐浴可以透過皮膚吸收而達到補元氣、潤脾益肺、生津和安神的作用。
茶社好清靜，裝修骨子，有十多種茶葉任揀，價錢有平有貴，重有專人即場沖泡，唔使自己郁手都可以有靚茶飲！
這裏連迷你戲院都有，每日由下午兩點到凌晨一點，會播放五場電影，我睇過拍攝當日嘅戲目，戲種有新有舊，好似《老鼠愛上貓》、《我老婆唔夠秤》都有得睇。
呢度有兩間男休息靜區和女休息靜區嘅房間，畀客人免費過夜，每張休息椅啱啱好夠一個人瞓，一間房有數十張，怕嘈可以畀?20瞓收費卧鋪，同樣是休息椅一張，只係每兩三張就有矮牆間開，比較安靜。
起初諗住餐廳都係純粹食飯，點知都有粵菜、潮菜和客家菜選擇，平日現場會有人演奏二胡和吹色士風，逢星期五、六、日節目會較豐富，增設舞蹈和唱歌表演，食完飯重可以去隔籬間酒廊摸吓酒杯底，唔慌會悶！
電話：(86)7556609599-8041
地址：深圳市華僑城海景花園裙樓
營業時間：二十四小時營業
收費：成人門票?88?位，1.1米以下兒童免費入場，1.1米以上兒童需買全票，6時半前進場優惠價?68，當日上午11時至翌日上午11時為一次浴資計費時段，超時需另收浴資。
交通：可於羅湖火車站乘搭101號大巴或觀光巴士直達，車程約20分鐘，乘
的士車費約?70。
備註：顧客不可穿着泳衣或衣服使用浴池。