隔晚美股大散，港股只係唔見46點，算係幾叻吓，大概理由係先一排港股冇美股升得咁勁，所以跌起上嚟都有個譜。
窩輪交投仍然係集中喺恒指輪身上，Call與Put都有，輪價變化自然同恒指掛鈎。個市暫時都好難升得乜嘢出樣，除非美伊戰局忽然傳來有利美軍嘅新聞，但港股市底又唔算太壞，低位承接力唔弱，睇吓幾隻地產股反彈幅度就清楚。做恒指輪策略，係當大市升之時趁低揸入Put輪，當大市跌之時則趁低揸入Call輪。
恒指Put輪對象係9587同9698；Call輪對象則係9670同9723。呢4隻輪都係溢價低，買賣非常容易，爆炸力（與殺傷力）頗高。
國際油價散完一輪後，周一晚美軍打入巴格達唔係太順利，又回升番。中海油（883）與中石化（386）股價升番啲。中石油（857）則冇升冇跌，而啲輪就有勢。
中石油Call輪9232，由冷變熱，成交由3球增至18球，收13.1仙，升幅6.5%。隻輪11月到期，溢價1.6%，槓桿率12.5倍，數據唔錯，可以短線炒吓，但小心油價隨時回頭拖低中石油股價。
中石油Call輪9361，6月到期，現價11仙，負溢價0.6%，槓桿率14.9倍，條件其實比9232更靚，但交投少好多。
章盛