香港人最鍾意食，但做得好又坐得舒服嘅地方唔多，所以私房菜一直有市場，最近又多咗一間。話說張堅庭做餐廳做出癮，喺灣仔間舖頭樓上租咗個單位，諗往搞私房菜，但係籌備咗幾個月都開唔到張，皆因搵唔到個廚，最近卒之畀佢請到以前佳餚店個大師傅；開張頭一晚，張敏儀、李柱銘等去捧場，試吓新店嘅順德菜，重有為食嘅肥佬黎份。
講起李柱銘，雖然佢冇做民主黨主席，但仍然馬不停蹄四圍飛，噚日佢同涂謹申就齊齊飛去歐洲，同行嘅重有羅沃啟。佢同八方講，頭兩晚佢哋會先去歐洲議會講《基本法》二十三條問題，之後會轉去日內瓦見人權組織，禮拜五返港。八方問英美聯軍打緊伊拉克，西方班人點得閒睬你？馬丁話打仗還打仗，都有其他嘢要做㗎。
傳真︰2623-9278
電郵︰